Ni Rudy Ram. Rumbaoa
KAHULUI, Maui- Gutgutigoten ti Maui Filipino Working Group [MFWG] dagiti amin a residente ti Maui a makipartisipar iti maisayangkat a naulimek a panagmartsa [silent march] no Hunio 3, 2008, kas pagraem ken respeto iti dua a Filipinas a nagbalin a biktima iti nakaam-ames a pammapatay itay kallabes gapu iti "domestic violence."
Maangay ti panagmartsa iti oras ti alas kuatro media agingga iti alas singko media ti malem iti Kaahumanu Avenue a sumango iti Maui Community College.
Kuna ni Ret. Judge Cornelia Soberano, miembro ti Filipino Working Group, "a maysa daytoy a trahedia iti biang dagiti babbai." Nabangon ti organisasion idi 2007 ken inesponsoranna ti maysa a workshop. Gagem ti nasao a grupo ti mangikalintegan ken ipaayan ti sulosion dagiti problema a makaapektar iti inaldaw a panagbiag ti komunidad ti Filipino, karaman ditoyen ti domestic violence.
Inlawlawag ni Soberano, "kas maysa a komunidad, masapul ti panagkikinnamayet ken kooperasion tapno adda panagkaykaysa ken maysa a boses nga agtimek kontra iti domestic violence." Innayonna a dakes ti domestic violence.
Nangrugi ti initiatibo ti silent march babaen iti panakitunos ti FWG iti Women Helping Women [WHW], maysa nga ahensia ti komunidad a mangipapaay iti tulong kadagiti agbalin a biktima ti domestic abuse iti Maui. Ket babaen iti daytoy a wagas, idauluan ti FWG ti mangisayangkat iti panagmartsa ken panag-vigil a maidaton iti panakalagip da Marissa Dumlao, mapapati a pinaltogan ti asawa daytoy idi Mayo 26 idiay pagtaenganda iti Halawa Heights, Oahu. Iti nasao a pasken, malagip met ni Della Dikita, sabali a Filipina ken ina. Maipagarup a napapatay ni Dikito idi Abril 25 babaen iti asawana.*
[kitaen ti Filipino Working Group iti www.mauiflg@earthlink.net wenno iti www.dagitikappurosadamdamagitihawaii.blogspot.com]
___________________________________________________
No comments:
Post a Comment