Ni Rudy Ram. Rumbaoa
ITI umuna a pakasaritaan ti Maui, maysa a Filipino manipud iti Ilokano a ramut ken anak ti dati a trabahador ti kaunasan, ti nabotosan a mangidaulo ti Maui County Council.
Ni Dennis A. Mateo, wenno "Danny," ti nalatak nga awagna kadagiti makaam-ammo kenkuana, ken anak da Inocentes Mateo ti Laoag City ken Nora Lopez, ti mangiturong kadagiti Filipinos iti aktibo a partisipasion iti biag ti politika iti komunidad a nagtitiponan ti nagduduma a puli iti Maui. Maysa a pakasaritaan para kadagiti Filipinos ti panangidaulona ti konseho.
Idi tawen 1929, napan ni tatangna iti Hawai'i. Dagitoy met la a nagannak ti nangipasagepsep kenkuana ti kinaimportante ti panagsalukag, dedikasion ken panagtalek/panangibaklay ti maysa nga akem. Kangrunaanna, saan a pulos a tinalikudan ti ama ni Danny ti panangbigbig ti ramut a naggapuanna, ti kinapateg ti kinapatnengna nga Ilokano ken ti pategna a kas maysa a Filipino iti Hawai'i uray saan a mabigbig dagiti Filipinos iti Hawai'i kadagidi a tiempo, nangruna iti kina-Ilokano gaputa trabahadorda lang iti kaunasan, maysa a mannalon.
Maysa a pagulidanan ni Danny iti insuro kenkuana dagiti nagannakna- ti panangipanakkel iti ramut a naggapuan. Mamati a ti panangipateg iti ramut ket saan a mangpukaw iti kinaasino iti lugar a pananan ngem ketdi mangbiag iti perspekto a kinatao, iti komunidad ken iti lubong ti nagtitiponan dagiti nagduduma a puli.
Nagsapata ni Danny ken dagiti dadduma a miembros ti konseho idi Enero 2, 2009 iti Council Chambers ti Kalana O Maui building.
Sakbay ti panakabotos ni Danny iti baro nga akemna, nagserbi daytoy a kas vice chairman ken mangibagi ti Molokai.
Para ken ni Danny, yanninaw ti kinapakumbaba a nangrugi ken paneknekan dagiti naaramidanna iti komunidad a saanna nga imbain ti naggapuanna a puli-- impaayna ketdi ti umno a motibasion ken pigsa ti pagimbagan ken ti kinapintas a panagserbi iti publiko.
Iti nasurok a sangapulo ket maysa a tawen sakbay iti panakabotosna a mangibagi ti Molokai, nagserbi ni Danny a kas executive assistant ken ni dati a Council Chairman Patrick S. Kawano ti Molokai.
Ngem idi pimmusay ni Kawano idi 2002, nadutokan ni Danny tapno maipatugaw iti binakantian ni Kawano a posision. Kalpasanna, binotosan dagiti umili tapno mapatalgedan iti dayta a posision. Iti napalabas a dua nga eleksion, nagpaidasig ni Danny iti dayta a posision nga awan ti nangsuppiat kenkuana.
Iti biang ni Richard Caldito, Sr., nalatak a lider iti komunidad dagiti Filipinos ken dati a vice chairman ti Maui County Board of Supervisors, kinablawaanna ni Danny iti baro nga akemna iti konseho. Kuna ni Caldito a maysa a pagulidanan ni Danny kadagiti henerasion nga umay.
Iti napalabas a dua a tawen, inyun-una ni Danny ti panakabukel ti Housing Policy. Kasapulan dagiti developers daytoy a pagbatayan iti paglintegan tapno maited wenno mailako ti amin a yunits iti 40-50% iti kabaelan a presio kadagiti umili nga agngayangay a gumatang. Ngem adu a pannubok iti konseho ti naglasatan daytoy a pagannurotan sakbay a nakapasa. Ket gapu iti daytoy, nabenipisiaran dagiti working class nga umili iti Maui a makatagikua iti bukod a pagtaengan.
Kuna ni Danny a yun-una ti konseho dagiti kangrunaan a prayoridad a seknan ti panakaapekto ti ekonomia ti pagilian ken trabahuen daytoy nga umuna ti walo a komite iti konseho.
Mamati ni Danny a nasalsalun-at ti panagtrabaho no adda napintas a relasion iti nagbaetan ti ehekutibo ken lehislatura a sanga ti gobierno tapno al-alisto ti panakaaprobrar dagiti gakat.
Iti maysa nga isyu, mamati ni Danny a mapadaras ti agserbi iti komunidad no maksayan dagiti dadduma a pagannurotan iti proseso no mangala ti permit iti opisina ti mayor. Dayta a proseso iti agdama ket agbayag iti sangapulo ket dua a bulan sakbay a maited ti remodeling permit.
Ipanakkel ken itangtangsit ni Danny ti ehemplo nga impasagepsep dagiti nagannakna kenkuana-- ti agbalin a nasaldet iti trabaho. Idi simmangpet ni tatang ni Danny iti Hawai'i, nagtrabaho kadagiti nagduduma a kataltalonan ti kaunasan: umuna, idiay Hana, kalpasanna, idiay Paia, kalpasanna, immakar iti Makawao.
Kas met ken ni tatang ni Danny, adu met a panakasuot ken panakayakarna iti lugar ti trabaho. Ngem saan a dagitoy ti nagbalin a tubeng kenkuana, intuloyna ketdi ti nagbasa agingga a nagturpos iti St. Anthony High School iti Wailuku. Manipud dita, nagadal idiay Unibersidad ti Hawai'i iti Hilo ken naleppasna ti kina-Assoociate Degree in Human Services.
Bayat ti kaadda ni Danny iti Hilo, nagtrabaho iti Tropical Rent-A-Car ket kalpasanna, naital-o iti posision a kas management idiay Molokai.
Ni Danny ken ti kaingungotna, ni Clarissa ti nagindeg ken pinadakkelda dagiti tallo nga annakda iti Molokai.
Timmipon ni Danny iti Maui County a kas Molokai Economic Development Coordinator. Kalpasanna, nagtrabaho iti Kaluakoi Resort a kas Public Relations ken Community Liaison.
Nabigbig ni Danny kadagiti adu a naaramidan ken kontribusionna a nagimbagan ti komunidad. Itay nabiit, innaganan ken pinadayawan ti National Federation of Filipino American Associations [NaFFAA] Region XII ni Danny a kas maysa iti Hawai'i a maika-duapulo ket tallo a Filipino American elected officials idi Agosto 22, 2008.*
*Kitaen ti kaarngi daytoy nga artikulo iti www.filamobserverarticles.blogspot.com
_____________________________________________________________________
No comments:
Post a Comment