LAHAINA, Maui-- Idauloan ti Maui Filipino Community Council [MFCC], kaaliado ti Philippine community, civic, and cultural organizations of the county of Maui, ti maangay a 51st Miss Maui Filipina Scholarship Pageant no Hunio 12, 2010 idiay Hyaat Regency Maui Resort and Spa, Monarchy Ballroom.
Dagiti agsasalip:
*Abegail Blando-- agtawen iti sangapulo ket walo, ken senior student ti Baldwin High School. Plano ni Abegail ti agbasa idiay University of Northern Colorado para iti nursing degree. Taga- Bacarra, Ilocos Norte ken Abra ti puon ti Abegail. Dagiti naganannakna isuda Ruben ken Georgia ti Kahului, Maui.
*Shannel Ulep-- sangapulo ket walo ti tawenna, agturpos ita a tawen iti Lahainaluna High School. San Nicolas, Ilocos Norte ti puon ni Shannel. Da Nicholas ken Imelda ti dadakkel, taga-Lahaina ti dadakkel ni Shannel.
*Kaila Custer-- agtawen met la iti sangapulo ket walo, ken taga-Santiago, Isabela ti puonna. Da Cris ken Raquel ti Makawao ti dadakkel ni Kaila. Arapaap ni Kaila ti managala iti kurso nga Liberal Arts iti Unibersidad ti Hawaii-Maui College.
*Dibea Lapid-- agtawen iti duapulo ket maysa, ken agdama nga agad-adal iti University of Hawaii-Maui College para iti kurso a nursing. Taga-Leyte ken Manila ti puon ni Dibea. Dagiti nagannakna isuda Dindo ken Maria ti Los Angeles, California.
**Whitney Acoba-- agtawen iti sangapulo ket pito, senior student ti Maui High School, ken manamnama nga agbasa idiay University of Hawaii- Manoa apaman nga agturpos ti high school. Arapaap ni Whitney nga ipamaysa a gun-oden ti sirib maipapan ti ayup ken mulmula [biology]. Taga-Bacarra, Ilocos Norte ti puon ni Whitney. Da Willie ken Nena dagiti nagannakna.
Kuna ni Michelle Santos, executive director ti programa, a mangrugi ti pabuya iti oras ti 5:30 ti malem babaen iti no host cocktails a sarunoen ti pakabuklan ti programa iti oras ti 7 pm. Makaawat dagiti ticket holders iti 25% a diskuento ti food purchased manipud iti Umalu Restaurant iti kaaldawan ti pabuya.
Ti maur-or a pundo ket agpaay para iti scholarship program dagiti agsasalip ken dadduma pay a high school wenno college students.
Ti Tema ti pagsasalipan: "The Beauty of a Filipina Lies Within."
Para iti ad-adu pay nga impormasion, ag-email iti Miss Maui Filipina iti missmauifilipina@msn.com. wenno pasiaren ti scholarship website iti missmauischolarshippageant.com.*
_________________________________
No comments:
Post a Comment