Ni Rudy Ram. Rumbaoa
HONOLULU, Oahu-- Ni Celina Jean Macadangdang Hayashi ti Makawao, Maui, ti nainaganan a "Miss Oustanding Teenager of Hawaii" iti 8th Annual Miss Outstanding Teenager of Hawaii Scholarship Program a naangay idiay Outrigger Waikiki Hotel, Oahu, idi Nobiembre 23-24, 2007. Maysa ni Hayashi kadagiti agarup sangapulo ket pito nga agtutubo a babbalasitang a partisipante manipud iti intero nga estado ti Hawaii para iti daytoy agtinawen a programa dagiti eskolar.
Immuna iti daytoy, naited ti nagan dagiti partisipante a karaman iti programa ti kina-eskolar kalpasanna, saggaysa a naarisitda basar iti merito ti akademia, leadership ken iti panakipasetda iti komunidad wenno pageskuelaan. Tiningiting a naimbag dagiti napusgan a panel of judges iti nagduduma a kategoria kas iti scholastic achievement, citizenship, personal projection, essay ken teen image.
Naggapu dagiti partisipante iti nagduduma a pageskuelaan iti estado, pribado wenno pampubliko. Karaman ditoy da: Mary Bartolo ti Kapaa, Tammy Corden ti Kihei, Stephanie Foster ti Kapaa, SaraH Hirata ti Honolulu, Christian Kaholokula ti Kapaa, Angela Mones ti Kilauea, Grace Matsuura ti Hilo, Britney Mendoza ti Ewa Beach, Kristen Nakama, Kaneohe; Kyna Nakama ti Mililani, Courtney Ochi ti Honolulu, Lesli Osborn ti Kailua, Dominique Pascua ti Hanapepem Margaret Pascual ti Kapolei, Brittany Soures ti Honolulu ken Megan Walters ti Kailua-Kona.
First runner-up ni Margaret Pascual, balasang da Dino ken Lucy Pascual ti Kapolei, ken ti second runner-up nayawat ken ni Brittany Louis Soares, balasang ni Robin Louis Soares ti Honolulu.
Malaksid iti panakagun-od ni Celina ti titulo, nayawat pay kenkuana ti "Most Enthusiastic" gapu iti positibo nga ugali ken ammona ti makipagayam. Naawat ni Celina ti college scholarship monies ken libre a panagbiahe idiay Montana nga agatendar iti Miss Outstanding Teenager of Montana competition. Ti Upcountry Rotary Club of Maui ti nangisponsor ken ni Celina.
Ni Celina ket anak da Duane ken Agnes Hayashi ti Makawao, Maui. Junior ni Celina iti King Kekaulike High School ken miembro iti National Honor Society, isu ti Junior Class President, Vice President ti Maui District Student Council, ken panakabagi ti School Community Council. Maysa pay daytoy a student tutor, miembro iti Interact Club ken Drama Club, nagun-odna ti 5% iti klasena a buklen iti agarup 359 nga estudiante ken iggemna ti 4.15 a grado point average. Iti ruar ti eskuela, aktibo daytoy iti Pukalani Baptist Church ken Grace Bible Church Youth Ministries ken linawas nga agboluntario iti Maui Memorial Medical Center. Kaay-ayona ti agbsa ken agakem iti arte. Iti agdama, agad-adal iti ballet ken jazz. Arapaapna ti agbalin nga emergency doctor wenno plastic surgeon.*
____________________________________
No comments:
Post a Comment