Ni Rudy Ram. Rumbaoa
KAHULUI, Maui- Iti kaunaan a gundaway ken pakasaritaan iti panakarambak ti Barrio Fiesta ti Maui, naawis ni Senador Jose Pimentel Ejercito Estrada, wenno ti nalatlatak a naganna a "Jinggoy" kas kangrunaan a sangaili ken agsarita iti Maika-39 Annual Barrio Fiesta 2008 Miss Barrio Fiesta Coronation Night a maangay iti War Memorial Gym Complex-Soccer Field, Wailuku, Maui.
Nabotosan ni Sen. Estrada idi Mayo 2004 ket agngudo ti terminona no tawen 2010. Tallo a tawen kalpasan a naipatugaw ni Estrada iti Senado, nabotosan daytoy kas Senate President Pro-Tempore iti 14th Congress. Iti lakdis ti nakaikumitanna nga akem, agdama ni Estrada a Chairman ti Senate Committee on Labor, Employment and Human Resources and the Congressional Oversight Committee on Labor and Employment.
Impila ni Estrada ti sumagmamano a gakat ken resolusion tapno mapadur-as ken mapatibker ti annuroten wenno pagbatayan ti linteg a mangapektar ti trabaho ken ti overseas foreign workers, ramenan ti panakabalin ti lokal a gobierno, maproteheran ken taginayonen ti wayawaya ti panagsao, ken panangital-o ti pagimbagan dagiti agtutubo.
Sakbay a nabotosan ni Estrada iti senado, nag-mayor daytoy iti San Juan, Metro Manila manipud tawen 1992 agingga iti 2001. Bayat iti daytoy a terminona kas mayor, pinagbalinna ti San Juan kas "Most Progressive and Peaceful Municipality" iti intero a pagilian a Filipinas. Nagsapata pay daytoy kas "National President of the League of Municipalities of the Philippines."
Babaen ti napintas a kooperasion dagiti opisiales ken hunta direktiba ti Binhi at Ani, naawis ni Sen. Estrada a makipagrambak iti nasao a selebrasion a mangrugi no Mayo 23 agingga iti 25, 2008.
Malagip a narambakan ti umuna a Barrio Fiesta idi Mayo 31, 1970 babaen iti panangidaulo ti Maui Filipino Community Council.*
[www.dagitikappurosadamdamagitihawaii.blogspot.com]
_____________________________________________
No comments:
Post a Comment