Ni Rudy Ram. Rumbaoa
KAHULUI, Maui- Nakaawis ti imatang iti komunidad ti naulimek a panagmartsa ti Maui Filipino Working Group [MFWG] tapno maipeksa ti ikokontra ken mangkondena ti dakes nga ibunga ti domestic violence. Agarup tallo pulo a katao ti nakipaset iti daytoy a silent march a pakairaman ti pastor ti simbaan, disabled veteran ken miembros ti Maui Filipino Working Group. Iggem dagitoy a nagmartsa ti nagduduma a naisurat iti placard a naangay idi Martes, Hunio 3, 2008 iti Kaahumanu Avenue, Kahului.
Inesponsoran ti Women Helping Women [WHW], maysa daytoy a nonprofit a mangipapaay ti tulong a pagkamangan, counseling ken dadduma pay a serbisio pampubliko kadagiti biktima ti domestic violence.
Iti biang ni Ret. Judge Cornelia Soberano, kunana, "bassit daytoy nga addang, ngem adda namnama nga ited ti tunggal addang tapno maluktan ti pununot dagiti maseknan ket ikamangda dayta a problema." Ni Soberano ket maysa kadagiti orihinal a nangbangon ti Filipino Working Group ken akin-utek ti panakaisurat iti placard: "Sabali Manen A Filipina Ti Pimmusay," tapno maikkan ti atension iti publiko ti ipapatay dagiti tallo a Filipina iti daytoy a tawen idiay Oahu gapu iti domestic violence.
Kinablaawan ni Executive Director Stacey Moniz ti grupo ti Filipino Working Group iti panangipeksa iti rumamramram a problema seknan ti domestic violence. Kuna ni Moniz, "nagbalin a biktima ti domestic violence dagiti tallo a Filipinas gapu iti kaawan serbisio a pangiyumananda daytoy a problema, language barriers wenno nonprofit organization a tumulong iti kasapulanda." Innayonna a seknan ti domestic violence iti nagduduma a puli iti estado."
[Para iti ad-adu pay a detalye ken impormasion iti daytoy, kitaen ti www.mauifwg@earthlink.net wenno basaen ti dadduma pay nga artikulo iti www.dagitikappurosadamdamagitihawaii.blogspot.com]
_____________________________________________
No comments:
Post a Comment