Ni Rudy Ram. Rumbaoa
HONOLULU, Oahu--Impasa dagiti agpanpanday ti linteg iti Hawaii ti gakat a mangipalubos ti panakaistolar ti ignition interlock kadagiti luglugan tapno malapdan ti maysa a tao nga agmaneho iti kotse no addaan daytoy iti nasursurok a minimal blood alcohol level nga .08 a porsiento a naipaunegna nga arak. Kangrunaan a pakaistolataran daytoy a ramit kadagiti natiliwanen ken maulit-ulit nga aglabsing iti DUI [driving under the influence] ken highly intoxicated.
Kuna ni Leah Marx, executive director of Mothers Against Drunk Driving [MADD] iti Hawaii, a nabayagen nga inur-urayda ti panakaaramid daytoy a paglintegan. Nabayagen nga idurduron ken inlungalong ti organisasion daytoy a gakat iti lehislatura tapno ipalubos ti linteg ti panakaistolar ti ramit a mangsalbar ken maglapped ti nakaam-ames a panakadisgrasia dagiti makainum iti arak.
Iti biang ti panakangiwat ni Hawaii Gov. Linda Lingle a ni Russell Pang, kunana a naipasan daytoy a gakat iti lehislatura ket kaarngi met laeng iti immuna nga inyam-ammo a linteg ti administrasion kadagiti naglabas a sesion, kayatna ngarud a sawen a suportaran ti gobernador ti idea nga ignition interlock. Kuna ni Pang a nagkammayetan a trinabaho ti administrasion, ti MADD ken dadduma pay nga organisasion ti nabukel a linteg.
Idauluan ti task force ti panakaipresentar ti rekomendasion iti Lehislatura sakbay ti 2009 session. Maikkanto manen ti gundaway ti task force a mangidatag ti linteg iti umuna a paset ti tawen 2010 session tapno maipinal ti gakat. Manamnama a maimplimentar ti nasao a linteg no 2010.
Tapno mapakaammuan ti publiko ken makaukkon ti suporta, nailawlawag ken naipakita no kasano ti panakaaramat ken panagtrabaho ti ramit kadagiti opisiales ti polis iti traffic section, kasta met iti opisial ti County Departmet of Liquor Control.
Puyotan ti maipagarup a driver a nakainum iti nasanger ti mouthpiece ket maipatarus iti kompiuter ti records ti data. Ipalubos laeng ti ramit no makapasa wenno saan ti driver. No makapasa, ipalubos ti tulbek a pagandaren ti makina ti lugan; ngem no saan a makapasa, saan a pulos nga agandar ti makina. Iti nasao a linteg, mainayon pay iti ramit nga ignition interlock ti maysa a kamera tapno agala ti ladawan ti tao a mangpuyot iti ramit.
Makagastos iti $75 iti panakaistolar ti ramit ken adda pay mabayadan iti binulan a monthly fee para iti panaka-monitor. No makuenta ti igatang ti arak, agdagup iti $2.50 agingga iti $3.00 ti magastos ti uminom iti inaldaw.
Manamnama a makatulong ti sistema a manglapped kadagiti tattao nga agmaneho iti babaen ti driving under the influence [DUI].*
_______________________________________
No comments:
Post a Comment