ni Rudy Ram. Rumbaoa
WAIKIKI, Oahu-- Pinili ti United Filipino Council of Hawaii ni Dr. Aurelio Solver Agcaoili kas naisangsangayan nga edukador iti sibubukel nga Estado ti Hawaii babaen iti panangited ti UFCH kenkuana ti pammadayaw a Progress Award for Education para iti 2007.
Nayawat ti pammadayaw ken ni Agcaoili iti maysa a pormal a seremonia idiay Royal Hawaiian Hotel iti Waikiki, Oahu, idi Nobiembre 24, 2007. Kadua ni Agcaoili a napadayawan dagiti agarup 19 pay a binigbig ti UFCH, aliansa ti agarup 100 nga organisasion dagiti Filipino iti Hawaii.
Nabigbig ni Agcaoili gapu iti aramidna iti edukasion saan laeng iti uneg ti Unibersidad ti Hawaii nga agdama a pagpapaayanna a kas manursuro iti Ilokano, iti pelikula ti Filipinas ken kultura a popular, iti literatura, iti panagipatarus ken drama.
Kaduana dagiti nagduduma a civic organizations ken cause-oriented groups, kasta met ti GUMIL Hawaii, Annak ti Kailukoan iti Amerika, ken ti Timpuyog Dagiti Mannurat nga Ilokano, inrusat ni Agcaoili ti kaunaan a 2007 International Conference on Ilokano and Amianan Languages and Cultures. Isu met ti nangirubuat iti Fiesta Ilokano ken Amianan a naangay iti Philippine Consulate General ket manamnama a maangay iti kada Pebrero a bulan a panakarambak ti Philippine Arts Month.
Kinonseptualisa ni Agcaoili ti agtultuloy a panakaiyadal iti komunidad dagiti isyu iti kanser ken ti kinaranggas iti taeng babaen ti 4K Initiative [Kur-itan Kontra iti Kanser ken iti Kinaranggas iti Taeng] ken ti 3K Initiative [Kur-itan Kontra iti Kinaranggas iti Taeng], agpada a community language program nga adda iti babaen ti Ilokano Language and Literature Program iti Unibersidad ti Hawaii. Kadua ni Agcaoili a nangisayangkat kadagitoy nga inisiatiba ti Asian American Network for Cancer Awareness, Research and Training, ken ti Domestic Violence Clearing-house and Legal Hotline-Pilipina Rural Project.
Ni Agcaoili met laeng ti maysa kadagiti nangirugi iti Nakem Conferences, maysa itan a tignayan ken addaanen iti country chapter iti Filipinas, ti Nakem Conference Philippines nga indauluan ni Dr. Alegria Tan Visaya, sekretaria ti Board of Regents ti Mariano Marcos State University.
Inleppas ni Agcaoili, babaen iti Presidential Scholarship, ti kinadoktorado iti Unibersidad ti Filipinas a nangisuroanna sakbay a nagpa-Amerika. Inringpasna pay ti masterado iti business administrasion, iti arte medior iti pilosopia, batsilier iti arte klasikal, batsilier iti pilosopia. Maysa pay a lisensiado a mangisursuro iti California sakbay nga immakar iti Unibersidad ti Hawaii.
Mannurat ni Agcaoili iti Fil-AM OBSERVER ken BANNAWAG; kasta met nga agsursurat iti ingles ken tagalog. Ti nobelana a "Dangadang" ti maysa kadagiti napadayawan iti Centennial Literary Prize idi 1998. Inyalatna iti daytoy a tawen ken iti napalabas ti umuna a premio iti Gawad Komisyon para kadagiti koleksion ti daniwna nga Ilokano.
___________________________________________
No comments:
Post a Comment