ni Rudy Ram. Rumbaoa
HONOLULU, Oahu--Sangapulo ket piton a tawenen manipud narugian a mabigbig ti naisangsangayan nga aramid dagiti Filipinos iti Hawaii, innaganan ti United Filipino Council of Hawaii [UFCH] ti 25 nga indibidual a nakayawatan ti pammadayaw gapu iti ekstra-ordinario a sagut ken talento a simbolo iti panangbigbig ti publiko iti abilidad, kinalaing ken kinasirib dagiti Filipinos iti Hawaii.
Narugian daytoy a panakabigbig iti aramid dagiti Filipinos idi 1990, babaen ken ni Antonio V. Ramil, ti utek a nangiyuswat ti pammadaw.
Idauluan ni Ramil dagiti honorees iti daytoy a tawen. Naiyawat kenkuana ti pammadayaw kas "Father of the Progress Awards." Ti Juan Dionisio Sr. Lifetime Achievement Service Award ken UFCH Lifetime Achievement Award ket naiyawat kada Oscar Portugal ken Mario Ramil.
Inlawlawag ni Brian Andaya, practicing lawyer ken agdama a presidente ti UFCH, a ti panakaited dagiti pammadayaw kadagiti awardees ken tapno mangipakita ti panagkaykaysa dagiti Filipinos ken ti panagtalinaed ti napintas a pagulidanan nga aramid iti publiko/komunidad.
Kuna ni Andaya, dagiti pammadayaw ti simbolo no ania ti maaramid ti komunidad kadagiti tattao babaen iti panakaited ti pammigbig babaen iti miembros, a nangpaneknek ken ehemplo a pagsurotan wenno pagulidanan dagiti dadduma a kamengna iti sosiodad.
Duapulo ket lima nga indibidual manipud iti intero nga isla ti Hawaii ti nakaawat iti daytoy a pampubliko a pammigbig iti 2007 Progress Awards, inrepresentarda iti 15 a kategoria iti nasao a pammadayaw.
Maysa kadagiti nakaawat iti daytoy a pammadayaw ti Progress Awards for Education isu ni Dr. Aurelio SolverAgcaoili, agdama a coordinator ti Ilokano Language and Literature Program of the University of Hawaii iti Manoa ken kolumnista/editorial contributor ti Fil-Am OBSERVER.
Dagiti dadduma a napadayawan: William S. Julian para iti Agrikultura; Iwalani Tseu para iti Arte ken Entertainment; Leticia Serapion Castillo ken Barbara J. Haliniak para iti Serbisio Komunidad; Barbara Ann Bongo-Arthurs ken Ligaya M. Ricafrente para iti Edukasion; Alma T. Caberto, Erlinda Villena ken Dana Pastula para iti Entrepreneurship; Jorge Marzan ken Donovan dela Cruz para iti Serbisio Gobierno; Charlene Cuaresma para iti Humanitarian services; John Garcia ken Aldrin M. Villahermosa para Labor and Constructions; Randal Grant B. Valenciano ken Ronald Ibarra para iti Law and Jurisprudence; Mila Medallion para iti Media and Communications: Danilo L. Licudine para iti Science and Technology; Kurl B Nino para iti Ay-ayam; Louise Abilla ken Gregory Peros para iti Travel and Hospitality; ken Deisha Lei M. Pico ken Michael A. Dahilig- Outstanding Youth.
Nayawat ti "Ating Kaibigan Award" ken ni David Heenan, maysa a trustee iti Estate of James Campbell.
Napadayawan ni Heenan gapu iti nagbalin nga akemna iti Filipino Community Center iti Waipahu, ken nagbalin nga instrumento iti panakalged ti lugar ti nasao a center.
Ni Keahi Tucker, anchor ti KGMB9, ti nagbalin a timon ti awards ceremony. Indirihe ni Leo Rojas Gozar ti programa iti tema nga "Above and Beyond."*
___________________________________
No comments:
Post a Comment