Ni Rudy Ram. Rumbaoa
LIMTUAW ti nagan ti maysa a Filipino kas "Soldier of the Year" kalpasan iti lima nga aldaw a rinnisiris iti kompetision tapno mapaneknekan no asino ti kasikapan, smarte ken kalaingan iti U.S. Army.
Naited ken ni Spc. Heyz T. Seeker, iti 75th Ranger Regiment at Hunter Army Airfield idiay Georgia, ti pammadayaw kas kangatoan a soldado iti Army's Best Warrior Competition.
Iti Oktubre 8 nga artikulo iti US Army News Service, "iti namitlo daras a panakai-deploy ni Seeker idiay Afghanistan ken maysa iti Iraq ti dakkel a nakatulong kenkuana tapno adda naan-anay a preperasionna a makisalip iti nasao a kompetision."
Agarup 13 two-man teams ti nakipartisipar iti pasalip, a naangay idiay Fort Lee, Virginia. Adu ti naglasatan ni Seeker ket naibturanna ti kinaiget ti nagsasaruno nga aktibidad a mangsubok iti kinalaing, kualidad ken abilidad dagiti soldado manipud iti ranggo a private agingga iti sergeant first class.
Addan sangapulo a tawen ni Seeker iti US Army ken karaman kadagiti soldado a naiwaras idiay Afghanistan ken Iraq. Iti agdama, ni laeng Seeker ti kakaisuna iti pamiliana ti nagbalin nga Army Ranger, ket manamnama a maipangato ti ranggona kas umuna a Filipino sergeant major, kangatoan nga enlisted rank iti Army.
Nagdalan amin dagiti nakisalip iti naiget a pagsubok kas iti physical fitness tests, dua a milia a panagtaray, written examination mainaig iti general military topics, nagraduan a salaysay iti tunggal naited a topiko, kualipikasion ti M4 rifles, kualipikasion iti aldaw ken rabii a kurso ti orientation ken ebaluasion iti sumagmamano a bilang ti critical task ken drills, ken kasta met iti mistery event.
Saan a nadakamat no sadino a lugar ken puon ni Seeker idiay Filipinas.*
*[Aydot.com--Nobiembre 12, 2007]
_________________________________
No comments:
Post a Comment