Ni Rudy Ram. Rumbaoa
__________________________________
WAILUKU, Maui- Pinili dagiti agbasbasa iti Maui News ti Paradise Supermart kas "Best Filipino Cuisine" Nupay saan a nailawlawag iti panagbostos no karaman dagiti dadduma nga ethnic groups wenno sabsabali a puli iti panagpili. Iti best ethnic category, ti Paradise Supermart ti nakagun-od iti kangatoan a botos kadagiti amin a pagtagilakuan ti Filipino foods iti Maui.
Kuna ni Roger Santos, agtagikua iti Paradise Supermart, "Maragsakanak a makaammo iti daytoy a damag. Daytoy ti mangipaneknek a magustuan dagiti kostumer ti raman ken kalidad ti luto ti Paradise. Agtultuloy ti panagserbi ken ipaaymi ti kaimasan a luto kadagiti amin a kostumermi," immisem. "Kadagiti amin nga agbasbasa iti pagiwarnak a Maui News, agyamankami unay kadakayo," innayonna.
Idiaya ti Paradise restaurant ken grocery ti 30 a klase ti pagpilian a makan. Maluto ke maisagana iti inaldaw-aldaw ti Ilokano, Tagalog, American, local ken sabsabali pay nga Asian food. Inaldaw a nakalukatda para iti pamigat, pangaldaw ken pangrabii. Agawatda pay iti catering para iti ania man a klase ti okasion.
Da agkaingungot a Roger ken Tina Santos ti mangimatmaton ken agtagikua iti nalatak a supermart. Aktibo a miembro da Roger ken Tina iti Maui Filipino Chamber of Commerce [MFCC] ken inawatda ti Gintong Pamana Award nga inted ti MCCC, ken ti Progress Awards nga inted met ti United Filipino Council of Hawaii [UFCH].*
__________________________________
No comments:
Post a Comment