Rudy Ram. Rumbaoa
HONOLULU, Oahu- Tapno mabigbig dagiti estudiante nga addaan iti exemplary academic performance ken dagiti mangipangpangruna nga agad-adal iti Ilokano a lengguahe iti kina-Bachelor of Arts degree idiay Unibersidad ti Hawaii-Manoa, ti Ilokano Language and Literature Program, iyawatto ti UH ti gunguna kadagiti tallo nga estudiante nga agtartrabaho para iti kina-bachelor's degree dagitoy.
Nabigbig dagiti tallo nga Ilokano Program scholars kas Rachelle M. Aurellano, John Henry Acidera ken Abraham Flores Jr.. Manamnama nga umawat pay dagitoy iti saglilima gasut a doliar iti tunggal maysa. Ti seremonia ti pammadayaw ket maangay idiay Hale Koa Hotel, Honolulu, kabayatan ti B.A. Scholarship Banquet a naawagan iti "Panangitang-ok ni Laing" no Abril 25, 2008 iti oras ti 5:30 ti malem.
Napili dagitoy nga eskolars babaen iti independent scholarship committee manipud iti community-at-large babaen kada Ms. Agnes Malate, miembro ti advisory council of the Domestic Violence Action Center's Filipina Rural Project ken direktor ti Health Careers Oppurtunity Program of the UH Manoa; ni Mr. Brigido Daproza, presidente ti GUMIL Hawai'i [Ilokano Writers Association of Hawai'i], ken ni Dra. Belinda Aquino, direktor ti Center of Philippine Studies, Unibersidad ti Hawaii-Manoa.
Nairugi ti B.A. Scholarship sumagmamanon a tawen ti napalabas babaen ti unibersidad kas pakalaglagipan, kalpasan ti agarup treinta a tawen ti Ilokano language and literature instruction, naaprobaran daytoy a diaya idi 2002, ket naipamaysa ti Ilokano para iti Bachelor of Arts in Philippine Language and Literature.
Awan sabali nga unibersidad malaksid laeng iti Unibersidad ti Hawaii ti mangbigbig ti kinaimportansia ti lengguahe dagiti Filipino diaspora ken kadagiti agindegen iti Estados Unidos. Iti agdama, ti panakaidiaya ti Ilokano language and literature courses manipud iti elementaria agingga iti advanced levels ti mangitunda iti major, minor ken sertipikasion ti kakaisuna laeng a pakagun-odan wenno pakaalaan iti intero nga Estado ti Hawaii, iti Estados Unidos ken iti intero a lubong.
*Ni Rachelle Aurellano, maysa a senior, presidente ti Timpuyog: Ilokano Student Organization, asosasion dagiti amin nga estudiante nga agad-adal kadagiti courses iti babaen ti Ilokano Language and Literature Program ti nasao nga unibersidad.
Aktibo ni Aurellano iti komunidad, 1st runner-up iti Miss Oahu Filipina Scholarship Program idi 2007, isu ti nangibagi ti Timpuyog iti Umuna a Nakem Centennial Conference ken representante ti testimonial conference papers maipanggep ti ekspiriensa dagiti local born nga Ilokanos iti Hawaii.
*John Henry Acidera, manamnama nga agturpos daytoy iti kina-B.A. ti Philippine Language and Literature iti konsentrasionna ti Ilokano a pagsasao ken nabiit pay a nangrugi a nagtrabaho iti Department of Health ti estado.
Kas maysa a musikero, singer ken dramatist, nakipartisiparen daytoy kadagiti nagduduma a cultural productions a nakairamanan ti UH Ilokano Program ken iti komunidad. Iti agdama, itantandudona ti Ilokano language and culture.
*Abraham Flores Jr., makompletonan iti daytoy a tawen ti kina-senior para iti B.A. in Philippine Language and Literature ken iti panangipamaysana ti Ilokano iti babaen ti University's Honors Program.
Court interpreter ken translator ni Flores. Nagsukisok kadagiti isyu mainaig iti interpretasion ken translasyon. Raemen ken dayawen ni Flores ti thesis ti journalistic narratives and reportage of the Filipino executions, "Sharps, Sex and Stragulation," ta nangted daytoy iti textual critique ken ti panakabasa ti journalistic 'demonization' dagiti Filipinos babaen iti panangipablaak ti dua a kangrunaan a pagiwarnak iti estado sakbay ti Maikadua a Gubat ti Sangalubongan.*
[Dagiti Kappuros a Damdamag iti Hawaii]
_________________________________
No comments:
Post a Comment