WASHIINGTON-- Innem a pulo ket tallo a tawen kalpasan ti panagngudo ti Maikadua a Gubat ti Sangalubongan, maragsakan a nakaammo ti grupo dagiti Filipino veterans iti dandanin panakaipasa ti nabayagen nga ur-rayenda a military benefits dagitoy iti lehislatura ti Estados Unidos.
Inaprobaran ti Senado ti maysa a gakat tapno maipadakkel ti benepisio nga awaten dagiti beterano, a kaaduanen kadagitoy ti agnaed iti paset ti California. Manamnama a mangipila met iti gakat ti Balay Pagpandayan Linteg a kaarngi iti gakat nga inaprobaranen ti Senado sakbay nga aggibus daytoy a tawen.
Kuna ni Faustino "Peping" Baclig, agtawen iti walopulo ket innem, dati a guerilla officer ken maysa kadagiti nakalasat iti Bataan Death March, a nabayagen nga ur-urayenda daytoy a gundaway a nagbayag pay iti unos ti innem a pulo a tawen. Iti agdama, maysan a U.S. citizen ni Baclig nga agnaeden iti Whittier.
Iti biang ni Sen. Daniel Akaka [D-Hawaii], maysa a World War II veteran ken chairman of the Senate Veterans' Affairs Committee ken nagisponsor iti gakat, kunana: "Natured a nakirinnupak dagiti Filipino veterans iti babaen ti panagmandar ti U.S. military, timmulong dagitoy tapno agballigitayo iti daytoy a gubat."
Iti pagtakderan dagiti Republicans, nagkedked dagitoy iti panakapaadda ti baro a pension benefits a rason ti panakalapped ti Filipino provision iti nasapsapa a gundaway. Naaramid ti debate iti nasao a gakat ta paset daytoy a paglintegan tapno maipadakkel ti benepisio dagiti amin a beterano.
Rinaem met ni Sen. Ted stevens [R-Alaska], ti nasao a gakat nupay nadlawanna nga adda laengen nabatbati a lima a WWII veterans iti Senado a nagatendar iti panakadengeg ti gakat. Inaannugotna pay a nagastos unay ti panakataming ti gakat.
Nalapdan ti plano ni Sen. Richard M. Burr [R- N.C.], babaen ti botos iti Senado a 56- 41, a kunaenna a maiturong koma ti pension funds iti U.S. Veterans.
Ti veterans bill a nakapasa iti botos a 96 kontra iti 1, ti maipanamnama a mapapintas ti life insurance benefits para kadagiti disabled veterans nga ub-ubing iti tawenda a 65 ken kadagiti beterano nga agsagsagaba iti traumatic injuries manipud tawen 2001. Iti gakat, manayonan pay ti sumagmamano a housing benefits para kadagiti beterano nga agsagsagaba iti nakaro a panakauram ken tapno padakkelen ti serbisio ti trabaho ken education benefits pang-beterano.
Napundoan ti baro a benepisio iti agarup $250 milion babaen iti Filipino veterans provision nga agpaut iti sangapulo a tawen. Agarup $84 milion ti agpaay kadagiti Filipinos nga adda iti Estados Unidos a mabenepisiaran iti daytoy kas sagut tapno mapasayaat ti pagtaengan dagiti disabled vets. Ti nabatbati pay a $166 milion ket maibayad a pension benefits kadagiti Filipino veterans nga adda iti Estados Unidos ken 12,000 nga adda iti Filipinas.
Iti laksid ti dandanin panakaaprobar daytoy a gakat, adda pay sabali a problema a sangsanguen ti nasao a gakat iti administrasion ni Bush gaputa nagastos ti panakaikadakkel ken panakanayon ti benepisio dagiti Filipino vetererans nga agnaed iti Filipinas.
Iti agdama, agtawenen dagiti Filipino veterans iti 80s ken 90s, ti makuna a nangibaklay iti tuok ken panaguray no manon a dekada ti napalabas ti nagtalek a maipaima ti benepisio a naikari kadakuada idi nagtulnogda iti awag ni Pres. Franklin D. Roosevelt a makirinnupak kadagiti Hapon.
Naikeddeng iti 1942 legal opinion ti Veterans Administration nga awaten dagiti soldados ti benepisio a kas iti awaten dagiti U.S. veterans. Ngem nasirip ti kaaduan a dayta a desision ket saan a nainkalintegan gapu ti rason a nababa unay ti gatad ti magatang ken klase ti panagbiag iti Filipinas..*
[Damdamag Iluko- www.dagitikappurosadamdamagitihawaii.blogspot.com]
____________________________________________________________
No comments:
Post a Comment