Ni Rudy Ram. Rumbaoa
HONOLULU, Oahu- Kumpirmado ti panakadutok ni Ret. Judge Artemio Baxa kas miembro ti University of Hawaii Board of Regents ken mangibagi ti Maui babaen iti unanimous vote nga insayangkat ti Hawaii State itay nabiit. Mangrugi ti termino ni Baxa no Hulio 1, 2008 ken agngudo inton Hunio 30, 2013.
Maragsakan ni Baxa iti kompirmasion ti panakadutokna ket nagkari daytoy nga aramidenna amin a kabalenna nga agserbi iti pagsayaatan ti unibersidad.
Inlawlawag ni Baxa nga importante kenkuana ti edukasion sipud ubing pay daytoy ket daytoy ti makagapu no apay nga inaresgaranna a serken ti posision. Kunana a gapu iti edukasion, naital-ona ti kasasaad ti panagbiagda. Nupay daytoy ti nanglukat ti dalan iti panakaragpatna ti balligi, inakona nga uray bassit ti edukasion a naawatna iti Filipinas ken Estados Unidos, dina malipatan dagitoy a pannubok a nagpasaranna ta nalusotanna amin dagitoy kas pammaneknek ti balligi a nagun-odna iti agdama.
Nagyaman ni Baxa kada Gobernador Linda Lingle ken tallo a Maui Senators: da Roz Baker, Shan Tsutsui ken Kalani English a nangipaay ti suportada kenkuana.
Iti agdama, maysa ni Baxa iti Maui kas Deputy Prosecuting Attorney. Nayanak ken dimmakkel iti Barangay Teppang, Bacarra, Ilocos Norte. Nagimigrante ni Baxa iti Hawaii idi 1967. Isu ti kaunaan a Filipino ken naturalized American a nadutokan nga Circuit Judge iti Hawaii idi 1998. Nagretiro iti pangukoman idi tawen 2001.*
No comments:
Post a Comment