Ni Rudy Ram. Rumbaoa
MILILANI MAUKA, Oahu- Maikatlo daytoyen a murder-suicide case iti Oahu iti uneg ti dua a bulan. Segun iti imbestigasion dagiti polisia, nasarakanda laengen a nalamiis a bangkay ti ina, ama ken ti agtawen iti pito nga anakda a lalaki iti pagtaenganda iti Mililani Mauka.
Nabigbig ti ama kas Michael James, agtawen iti 43, ken mangimanmaniher iti bukodna nga insurance business iti ruar ti pagtaengan ti pamilia, ti kaingungot ni Michael ni Grineline Donato James, maysa a mangisursuro iti Farrington High School ken anakda Mr. Welgrin ken Matilde Donato, ken ti anakda a lalaki, ni Michael Junior.
Iti panagipalawag dagiti panakabagi ti linteg, pinatay ti ama ti asawana ken ti anakda, kalpasanna, kineltayna ti bukodna a biag. Imbati ti ama ti sumagmamano a sursurat a nangipakaammuanna kadagiti tattao ti inaramidna a krimen.
Kuna ni Donna Carter, residente ti Mililani Mauka subdivision, a dida pulos nakita ti maysa a seniales ti kaadda ti problema ti pamilia. Kasla dida patien a maaramid ti ama ti krimen ta kanayon daytoy a naisem a makisarita ken easy going person. Ket gapu iti daytoy, nabuak ti sibubukel a subdibision itoy a pasamak.
Maysa a postal worker ti nagtawag iti polisia idi maduktalanna ti agkaiwara a sursurat iti uneg ti mailbox ti pamilia. Nasarakan dagiti polis ti bangkay ni Michael iti uneg ti pagopisinaanna iti pagtaengan, idinto ti asawa ken ti anakda iti maysa kadagiti kuarto ti pagtaenganda.
Maipagarup a napapatay dagiti agina iti rabii, ken napasamak ti suicide iti kabigatanna, palawag ni Maj. frank Fujii ti Honolulu Police Department. Maisayangkat ti otopsia dagiti bangkay babaen ti Honolulu Medical Examiner tapno maammuan no kasano ti panakatay ti tunggal miembro ti pamilia*
No comments:
Post a Comment