Ni Rudy Ram. Rumbaoa
KAHULUI, Maui-- Aw-awisen ti grupo a Women Helping Women [WHW]ken ti panakibinnulig ti Maui Filipino Working Group [MFWG]a makipaset iti maangay a silent march no Hulio 8, 2008 iti oras ti alas kuatro media ti malem iti Kaahumanu Avenue a kasinnango ti Maui Community College iti Kahului, Maui.
Daytoy a silent march ket maidaton ken pangkongdena iti panakapapatayda Grineline James, agtawen iti 39, mangisursuro iti Farrington High School, Oahu, ken ti agtawen iti pito nga anakna, ni Michael James, Jr.
Kalikaguman ti grupo nga agkaykaysa dagiti umili a mangpasardeng ti panakatay dagiti babbai, nangruna kadagiti Filipina. "No to Domestic Violence," daytoy ti nabatad a mensahe a kayat nga ipaawat ti grupo kadagiti tattao.
Maikatlo a murder-suicide case iti Oahu ti panakapapatay da Grineline ken Michael, Jr, residente iti Mililani Mauka Subdivision, babaen iti bukodna nga asawa, ni Michael James, agtawen iti 43 ken mangimanmaniher ti bukodna nga insurance business iti ruar ti pagtaenganda. Pinatay ni Michael James dagiti aginana idi Hulio 3 sakbay a kineltayna ti bukodna a biag.
Malagip nga immun-una a napapatay ti dua pay a Filipina: ni Marissa Dumlao, napapatay idi Mayo 26 babaen iti panangpaltog ti asawana kenkuana iti pagtaenganda iti Halawa Heights, Oahu, ken ni Della Dikita a pinatay met ti asawana idi Abril 25 iti daytoy a tawen.
Para iti ad-adu pay nga impormasion iti Silent March, makiinnuman ken ni Cindy Cabrera Cline, Deputy Director, Women Helping Women iti email addressna: deputy@whwmaui.net wenno iti Maui Filipino Working Group nga idauluan da Cornelia Soberano, JD, Jenny Bissell, RN, Dr. Virginia Cantorna ken Kim Compoc, Executive Director, Maui Mediation Services/Theatre Director, wenno iti email addressda: mauifwg@earthlink.net.*
No comments:
Post a Comment