ni Rudy Ram. Rumbaoa
HONOLULU, Oahu- Nakasagana nga agsangaili ti Hawaii State Library iti panakalukat ti photo exhibit a maawagan iti "Singgalot: the Ties That Bind," no Sabado, Oktubre 4, 2008 iti alas onse ti bigat iti lobby ti bibloteka iti panakarambak ti Filipino-American History Month no bulan ti Oktubre.
Iti nasao nga exhibit nga inesponsoran ti Filipino-American Historical Society of Hawaii and the Friends of the Library of Hawaii, maipangruna a maiparang wenno maipakita ti pakasaritaan ti Filipino-Americans, ti panakidangadang ken nagappuananda a nagresulta iti nakaad-adu a kontribusionda iti komunidad. Maiparang ti exhibit manipud Oktubre 4 agingga no Oktubre 25 bayat ti regular nga oras ti panaglukat ti bibloteka.
Orihinal a naipakaammo iti publiko idi tawen 2006 idiay Smithsonian Museum iti Washington D.C., ken ti Hawaii iti Bishop Museum; ti "Singgalot" kas panglagip iti maika-sangagasut nga anibersario dagiti Filipinos iti imigrasionda iti Estados Unidos. Ti nalatak a The Silangan Singers ti mangipaay iti espesial a musika.
Malaksid iti dayta, maaramidto pay ti "Growing up Filipino" panel discussion no Oktubre 11 ken ti "Poetry readings" babaen kadagiti Filipino authors no Oktubre 25, 2008.
Malagip a pinirmaan ni Hawaii Gov. Linda Lingle ti Act 15 [HB3343 HDI] tapno mamagbalin a naan-anay a linteg. Ti nasao a linteg ket nakapasa iti 2008 Hawaii State Legislature no sadino a nainaganan ti bulan ti Oktubre kas "Filipino-American History Month" ken tinawen a panglagip ti kontribusion ti Filipino-Americans iti pakasaritaan ken Heritage of Hawaii and the United States.*
[Kappuros a Damdamag iti Hawaii]
____________________________
No comments:
Post a Comment