Showing posts with label Rudy Ram. Rumbaoa. Show all posts
Showing posts with label Rudy Ram. Rumbaoa. Show all posts

Aug 11, 2011

Filipino Pioneer "TATA CALDITO," Pimmusay

[+RICHARD "PABLO" CALDITO: FEBRUARY 1, 1913- JULY 25, 2011]
 
Filipino Pioneer "TATA CALDITO," Pimmusay
ni Rudy Ram. Rumbaoa


KAHULUI, Maui- Inawaganda isuna kas maysa nga asawa, ama, lolo, anak, kabsat, uncle, karruba ken gayyem. Maysa a life insurance man, realtor, ken nabotosan nga opisial ti gobierno. Pimmusay ni Richard "Pablo" Caldito, Sr., idi Hulio 25, iti tawenna a 98, iti pagtaenganna ti Kahului.

Bayat ti panagbiagna, adu dagiti kinaimbag nga impakitana iti komunidad, ngem iti ipupusayna, malaglagipto nga agnanayon dagiti nagapuananna. Maysa a Filipino. Maysa nga Amerikano. Managraem ken raraemen dagiti tattao.

Adu kadagiti agtutubo ti mangraem kenkuana ket awaganda ni Caldito iti "Tata," kayatna a sawen, "Ama," wenno "Lolo."

Idi 1956, naiyukit ti naganna iti pakasaritaan dagiti Filipino iti Hawaii idi nangabak iti Board of Supervisors ti County of Maui, ti forerunner ti County Council. Ni Caldito ti kaunaan iti Filipino a ramut a nangabak/nabotosan iti county government, ken isu pay ti kaunaan a Filipino Democrat a nabotosan ken naipatugaw iti gobierno- iti Hawaii ken iti intero  nga Estados Unidos.

Nagserbi ni Caldito iti Board of Supervisors iti sangapulo ket maysa a tawen.

Kadagidi immuna a paset ti tawen 1950, nakita ti Democratic Party ti Hawaii iti ibabangon ken panangtengngelda ti rienda ti gobierno ken politika iti isu amin nga isla ti estado ti Hawaii. Ni Elmer Cravalho, akin-iggem iti maysa a tugaw iti territorial House of Representatives, ken  isu ti agdama idi a chairman ti Maui Democratic Party.
 
Idi immuna a nabotosan ni Tata Caldito iti ILWU, nagbalin a dominante a puersa ni Caldito iti tay-ak ti politika ta nagun-odna ti pannuporta ti unyon. Gapu iti daytoy, inaramatna ti puersa ti unyon ket nagballigi.
 
Dagiti dadduma pay a kadua ni Tata Caldito a nabotosan iti Board of Supervisors idi 1956 isu da Hannival Tavares, Harry Kobayashi, Goro Hokama ti Lanai, ken Soon Oak Lee ti Molokai. Ni laeng ti Tavares ti kakaisuna a Republican a nangabak.

Nakalalagip ti umuna a pannakailayon ni Tata Caldito ta dayta a tawen ti maika-50 a tawen nga anibersario ti pannakalagip iti isasanglad dagiti immuna a sakada- dagiti naawis a Filipino nga agtrabaho iti plantasion ti kaunasan ti Hawaii. Simmangpet dagiti immuna a sakada iti isla idi 1906.

Asino ni Caldito?
Nayanak ni Richard Caldito, Sr. idi Pebrero 1, 1913 iti bassit a barrio ti Libong, Bacarra, Ilocos Norte. Napan ni Caldito iti Hawaii a kaduana dagiti nagannakna idi 1922 idi agtawen laeng iti siam. Timmulong kadagiti nagannakna a nagtrabaho iti Wailuku Sugar Company. Di nagbayag, nagbalin a delivery man ti Waihee Dairy a kaduana ni Toshi Ansai, manager ken agtakua iti nasao a pagtagilakoan ken maysa a die-hard Republican.

Binirngasan dagiti kameng ti pamila ken makaam-ammo ken ni Caldito iti "Pablo," naipasurot iti nagan ti agdindinamag a lider ti Filipino labor Pablo Manlapit idi tawen 1920s.

Nagadal ni Caldito iti Lahainaluna School. Nagala iti correspondence courses iti LaSalle Extension University. Nagbalin a manager ti Hawaii Life Insurance Company, ken kasta met a salesperson ti Maui Realty Company.

Timmulong ni Caldito a nangbangon iti United Filipino Council of Hawaii [UFCH]. Isu pay ti masansan a kadua ni Consulate General Juan Dionisio a mapan agpasiar kadagiti nagduduma a kampo ti plantasion dagiti Filipino iti Maui ken nangipaay ti pannuporta iti organisasion iti 1959. Miembro ken opisial kadagiti nagduduma nga asosasion a kas iti Maui Lions Club, Toasmasters Club, Boy Scouts, Maui Life Underwriters Associations, Maui Fil-American Gold Club, the Diocesean of Congress of Filipino Catholic Clubs, Maui Filipino Chamber of Commerce ken Binhi at Ani.

Naawat ni Caldito dagiti nagkaadu a pammadaw ken pannakabigbig. Maysa kadagiti kangrunaan a naawatna isu ti pannakapilina kas maysa a 10 Distinguished Alumni of Wailuku Elementary School iti naangay a centennial celebrations ti nasao a pagadalan idi 2004. Naisab-it ti 11"x 8" a ladawan ni Caldito iti akinkannigid a pader ti main hallway ti eskuela  a kaduana ti ladawan da Wendell Crockett, Judge Second Circuit Court; Jesse Kuhaulua, sumotori; Charles Ota, negosiante, Maui County Council member, Office of Hawaii Affairs board member; Ralph M. Murakami, Maui District School Superintendent; Velma McWayne Santos, Hawaii State House representative, Maui County Council member, Director of Human Concerns; Shinichi Suzuki, Maui Aikido Dojo founder and renowned aikido instructor; Henry Takatani, Hawaii State Sebator; Shige Yamada, eskulptor; ken Masaru Yokuochi, umuna a director ti Hawaii Council of Culture and the Arts ken nagpapaay a presidente ti Maui Arts and Cultural Center.

Dagiti dadduma a pammadayaw ken pammibigbig a naawat ni Caldito: Maysa kadagiti 100 Outstanding Citizens of Maui, Distinguished Service Award babaen ti Maui Filipino Community Council, maysa kadagiti 20 Outstanding Filipino Americans ti North America ken Guam babaen ti Filipino Image Magazine a nakabase iti Washington, D.C, Gintong Pamana Award babaen ti Maui Filipino Chamber of Commerce, Progress Award for Lifetime Achivement babaen ti United Filipino Council of Hawaii, ken maysa kadagiti 11 Outstanding Maui Filipinos a naipresentar idi 2006 iti pannakarambak ti pannakalagip ti maika-100 a tawen dagiti Filipinos iti Hawaii.

Inulila ni Tata Caldito ti anakna a lalaki ni Richard [Toni], Jr, ken ti dagiti annakna a babai da Nora Apuna, Ivy Caldito, ken Iola [Richard] Balubar; ti manugangna ni Peter Rodriguez; dagiti siam nga appoko ken siam nga appoko iti tuod. Immuna a pimmusay ti kaingungotna ni dati a Dorothy Lovell ken ti balsangna ni Charlene Rodriguez.




Feb 1, 2011

MFCC, Agawaten iti Nominasion para iti Gintong Pamana Leadership Awards

ni Rudy Ram. Rumbaoa

KAHULUI, Maui- Manarimaanen ti panagawat ti Maui Filipino Chamber of Commerce [MFCC] iti nominasion para iti Maika-14th Gintong Pamana Leadership/Achievement awards. Maipaay ti pammadayaw kadagiti amin a Filipino iti komunidad a kualipikado iti kina-lider a posision iti nadumaduma a tay-ak ti trabaho segun iti naaramidanda a pagsayaatan ti komunidad.

Masapul a maawat ti kompleto a nomination forms saan a naladladaw ngem ti Abril 29, 2011, ti opisial a panagngudo ti pannakapili dagiti kualipikado.

Para iti nomination forms ken dadduma pay nga impormasion, tawagan ti chamber member wenno ag-email ken ni CJ Ancheta at anchetac003@hawaii.rr.com.

Jan 20, 2011

Naisangsangayan nga "Ama ken Ina" da Pepito ken Alice Ragasa

[da Alice ken Pepito]

ni Rudy Ram. Rumbaoa

KAHULUI, Maui-- Naiyawat kada Pepito ken Alice Ragasa, taga-Kahului, Maui, ti pammadayaw a kinaisangsangayan nga "Ama ken Ina" ti tawen 2010 babaen dagiti organizers ti Binhi at Ani, bayat iti pannakarambak ti 2nd Annual Rice Festival ken First Lantern Festival.

Nagdenna da Pepito ken Alice kas agasawa iti unos ti limapulo ket innem a tawen, addaan iti anak a lalaki, ni Guy. Maysa ti apokoda, ni Stacey, ken dua ti apoko ti tuod, da Ka Sandra ken Jer-zee.

Maragsakan dagiti agasawa iti pammadayaw a naawatda. Dakkel ti kontribusion ti naipaayda iti pagsayaatan saan laeng nga iti komunidad dagiti Filipinos no di pay iti intero a Maui.

"Adu ti naserbianda iti komunidad," panangipudno ni Flor Garcia, Bise Presidente ti Binhi at Ani. "Kas maysa nga opisial ti unyon, adu ti natulongan ni Pepito a kameng ti unyon. Iti biang ni Alice, agnanayon ti suportana kadagiti Filipino sponsored events," innayon ni Garcia.

"Nabayagen nga am-ammok dagitoy nga agasawa. Napuner ken napigsa ni Pepito iti unyon a nakikamenganna kadagidi un-unana a panawen. Ket ni Alice, adda latta a mangsupsuporta iti kaingungotna. Adda latta iti sibayna, saanna pulos a pinanawan," kinuna ni Retired Artemio C. Baxa.

Ni Pepito ti maysa kadagiti 498 a trabahador ti plantasion a nangpanaw ti Filipinas ken nagluganda iti barko a SS Maunawili iti pantalan ti Cabugao, Ilocos Sur, idi 1946. Apaman a nakasangladda iti Maui, dagus a naidestino ni Pepito iti Maui Pineapple ti Haliimaile.

Idi 1947, nagaplikar ket naawat iti Hawaiian Commercial and Sugar Company [HC&S] ket nagtrabaho a kas journeyman welder. Kalpasanna ti makatawen, nabotosan ken nagserbi a kas full time business agent ken membership director, Maui division ti International Longshoreman and Warehousemen Union [ILWU].

Bilang maysa nga opisial, naited ken Ragasa ti opurtunidad a tumulong nga agserbi kadagiti ka-Filipinoan ken sabsabali pay a puli pakaseknan dagiti medical pension plans da.

Nagbunga ti kinaanus ken reggetna a nagbasa ket naawatna ti high school certificate manipud iti dati a Department of Public Instruction, ngem Departamento ti Edukasion ita, ken Certificate in Welding and Blueprint Reading manipud iti Maui Vocational School idi, ngem Maui College ita.

Gapu iti kaadu a tulong ken kontribusionna iti komunidad, napadayawan ni Pepito a kas Most Outstanding 1946 Maui Sakada ken naited pay kenkuana ti pannakabigbig kas maysa kadagiti 10 Most Outstanding Sakadas iti intero nga estado ti Hawaii.

Nagun-od pay ni Pepito ti pammadayaw a "Gintong Pamana" Leadership Achivement Award. Nagpapaay pay iti nagduduma a posision iti gobierno.

Iti biang ni Alice, nayanak iti Hawaii ngem taga-Urdaneta, Pangasinan ti puonna. Nagatendar iti night classes iti accounting ni Alice idiay Maui Community College. Nagtrabaho iti First Hawaiian Bank iti innem a tawen, ken kalpasanna, kas maysa a county clerk iti lima a tawen. Nagserbi pay a receptionist iti Mayor's office iti tallo a tawen.

Aktibo ni Alice iti komunidad dagiti Filipinos. Iti agdama, isu ti presidente ti Kahului Filipino Senior Citizens group. Isu pay ti sekretaria ti Binhi at Ani, ken chairperson ti Miss Maui Filipina ken Miss Barrio Fiesta.

Naangay ti seremonia ti pammadayaw idi Disiembre 18, 2010 iti Binhi at Ani Maui Filipino Community, Kahului, Maui.*

Dagiti Living Sakadas ti Maui

[nabulod ti ladawan iti Fil-Am Observer/[manipud kannigid-
agpakannawan]: Apolonio Tabangcura, Silvestre Baggao,
Mariano Salcedo, Pedro Macadangdang, Pepito Ragasa,
ken Andres Suliven. Saan a nairaman iti ladawan da:
Felix Yagin, Ernesto Guerrero ken Richard Caldito.


ni Rudy Ram. Rumbaoa

MAUI, Hawaii-- Naited iti tunggal maysa kadagiti nabatbati pay a sibibiag a Sakadas [living Sakadas] ti gundaway a nangbatingting ti centennial bell bayat iti pannakarambak ti Rice Festival ken kas panglagip iti isasangpet dagiti immuna a sangapulo ket lima a sakadas iti Hawaii. Malagip a dagitoy sangapulo ket lima a sakadas ti nanglukat iti dalan ti napinpintas a masakbayan dagiti pampamilia ken kaputotan a simmaruno kadakuada.

Kalpasan ti isasangpet dagitoy sangapulo ket lima a sakadas iti Hawaii idi 1906, nagsasaruno ken immadu dagiti nagregget, makaadak ken nagsangpet a sakadas manipud iti nadumaduma a paset ti Filipinas, partikular iti Ilocos region, tapno sapulenda ti napintas a gasat ken pagkabanan ti pagbiag iti isla ti Paraiso. Naipanda iti kampo sada naidestino iti plantasion ti kapinyaan ken kaunasan tapno sadiay nga agtrabahoda.

Makuna a dakkel ti kontribusion dagitoy a sakadas iti socio-economic ken kasta met iti benneg ti political growth ti Hawaii. Gapu iti kinagaget ken kinaanusda a nagtrabaho, naipaayan iti nalanglangto a biag ti kaaduan a Filipinos nga adda iti Hawaii ita.

Dagiti living sakadas ti Maui: Apolonio Tabangcura, Silvestre Baggao, Mariano Salcedo, Pedro Macadangdang, Pepito Ragasa, Andres Soliven, Felix Yagin, Ernesto Guerrero ken Richard Caldito.

Oct 9, 2010

Oktubre: Malagip ti Pakasaritaan ti Filipino-Americans

 
ni Rudy Ram. Rumbaoa


Apay a Filipino Americans?
Amerikano dagitoy a Filipino Americans nga aggapu iti nagtaudan a puli ti Filipinas.

Ti komunidad dagiti Filipino Americans wenno Fil-Ams iti ababa a pannao, ti maikadua a kadakkelan a bilang ti subgroup Asean Americans ken kadakkelan a bilang ti Southeast Asean American group. Kasta met a dagiti Filipino Americans ti kadakkelan a bilang ti grupo dagiti Overseas Filipinos.

Idi tawen 2007, adda mapattapatta nga uppat a milion, wenno 1.5% iti komunidad ti Filipino Americans iti populasion ti Estados Unidos. Nasurok a kagudua iti komunidad ti naturalized wenno Amercian-born, idinto a dagiti nabatbati ket Filipino nationals wenno dual citizens nga agpada a makipagili iti Filipinas ken Estados Unidos.

Ti komunidad dagiti Filipino Americans ti maikadua a kadakkelan a bilang ti "Asian Americans" ken kadakkelan a bilang ti grupo ti "Southeast Asean Americans." Mapapati pay a dagiti Filipino Americans ti kadakkelan a subgroup iti "Overseas Filipinos."

Panangibanag

Naestablisar wenno nabangon ti umuna a Filipino settlement iti North America idi tawen 1763 iti St. Malo, Louisiana. Naibanag dagiti dadduma ti bayous of Louisiana a kadua wenno katipon ti Manila Village kas kadakkelan a bilang iti Barataria Bay.

Nupay kasta, naaramid ti mass migration iti naud-udi a paset ti maika-sangapulo ket siam a siglo idi agkasapulan unay iti trabahador ti plantasion ti Hawaii ket kataltalonan ti California, naawis ti rinibribu a trabahador-- kaaduanna ti lallaki. Gapu iti panakaisina ken napuersa ti segregasion [wenno nailasinda iti sabali a puli], dagitoy a migrante ti nangbangon ti umuna a "Little Manilas" iti maysa a lugar ti siudad.

Saan a kas kadagiti dadduma nga Asean Americans, kas iti Tsino ken Vietnamese, gagangay nga agduyos ken ibanagda ti makuna a kaugalian nga aramid, agbiag a normal iti komunidad, kaaduan kadakuada ti nagtaeng iti nangato ti bilangna a populasion iti komunidad.

Iti lugar a nangato ti bilangna a populasion dagiti Filipinos, masansan a mangbukel wenno mangbangon dagiti Fil-Ams iti organisasion- ti gagemna, tapno agtalinaed ti panagsisinnakit dagiti Filipinos iti dayta lugar, kayatna a sawen, "maysa a pamilia," a daytoy ket kangrunaan nga maar-aramid iti kultura ni Filipino. Urnosen dagitoy nagduduma nga organisasion dagiti pasken nangruna no maipanggep iti panagur-or ti pundo nga agserbi iti programa wenno aktibidad ti organisasion. Nupay kaaduan kadagitoy a pasken ket atendaran dagiti Filipinos, dagitoy nga asosiasion ket paset laeng ti aginaldaw a panagbiag dagiti Fil-Ams. Kaaduan a pakasarakan dagitoy nga asosasion wenno organisasion ket iti estado ti California ti Mainland ken iti isla ti Hawaii. Sumagmamano kadagitoy a komunidad dagiti Filipinos ti nagbangon met wenno nagestablisar iti "Little Manilas," lugar a sibiko ken distrito dagiti negosiante para iti komunidad dagiti Filipino Americans.

Iti tawen 2008, maysa kadagiti uppat a Filipino Americans ti aggusto a mapan iti Southern California tapno agnaed sadiay. Maipagarup nga addaan ti bilang dagitoy a Fil-Ams iti California iti nasurok a maysa a milion. Ti Greater Los Angeles ti makuna a taeng ti kaaduan a Filipino Americans
nga addaan iti bilang nga 370,000. Iti laengen Los Angeles County, agarup 262,000 ti bilang dagiti Filipinos, kangrunaan a pakasarakan ti kasta a bilang ti single county iti Estados Unidos. Iti siudad ti Los Angeles, iti Westlake ti makuna a Historic Filipino town. Ti San Diego County ti maikadua a pakasarakan kadagiti Filipinos, ngan-ngani 200,000 ti bilangda. Ti San Diego County laeng iti metropolitan area ti US ti kadakkelan nga Asean American nationality a buklen dagiti Filipinos. Adda maysa a paset ti California State Route 54 iti San Diego ti opisial a napanaganan iti "Filipino-American Highway," kas pagdayaw iti Filipino-American Community.

Uray iti San Francisco, California, dakkel met ti bilang dagiti Filipino Americans iti komunidad, idinto a madlaw ken makita ti panagdakkel ti bilang ti populasion dagiti Filipinos iti lugar kas ti Chicago, Houston, Las Vegas, Phoenix, Washington D.C ken Seattle. Iti intero nga estado ti Hawaii, adda populasion dagiti Filipinos nga 275,00.

Taeng ti agarup 215,000 a bilang dagiti Filipinos ti New York. Nagbalinen a tradision iti tinawen a panakaangay ti Philippine Independence Day Parade iti umuna a Domingo ti bulan ti Hunio, iti Madison Avenue. Okuparan ti pasken ti ngan-ngani 27 a nagkorosan ti kalsada ti siudad, karaman ti nasurok a tallo nga oras a parada ken ti agmalmalem a street fair ken cultural performances.

Idi Hunio 2002, ni Presidente Gloria Macapagal-Arroyo ken sumagmamano a panakabagi ni US President George W. Bush ti pormal a nanglukat para iti publiko ti kabangbangon a Filipino Community Center iti Waipahu, Hawaii. Daytoy a center ti kadakkelan a Filipino American institution iti Estados Unidos- a ti gagemna, mapreserba ti pakasaritaan ti kultura ti Filipino Americans.

Ti Edukasion
Maibilang dagiti Filipino Americans ti nakagun-od iti nangato nga edukasionna iti Estados Unidos. Iti kaudian a panagsangpet dagiti Filipinos, isuda ti nagsupusop iti pagkurangan ti edukasion, healthcare ken information technology iti Estados Unidos.

Edukasion a Nagun-od basar iti 2004 (Porsiento iti Populasion 25 ken agpangato)

Bilang ti Nagturpos iti High School ti Filipinas nga adda iti Estados Unidos: 90.2% , ti Bachelor's Degree- 47.9%; ti Tsina- 80.8% ken 50.2%; ti Hapon-93.4% ken 43.7% ken ti pagilian a Korea-90.2% ken 50.8%. Ti total a populasion dagitoy iti Estados Unidos- 83.9% iti highs school graduates ken 27.0% iti Bachelor's degree.

Iti California, kaaduan dagiti Fil-Ams ti nagturpos manipud iti kolehio no idasig kadagiti Asean Americans. Gapu iti napigsa nga impluensia ti America iti sistema ti edukasion iti Filipinas, dakkel ti bentahe dagiti immun-una a Filipino immigrants tapno makagun-od iti professional licensure iti Estados Unidos.

Iti panagadal nga insayangkat ti American Medical Association, dagiti nasanay a Filipino a mangngagas ti mangbukel iti sumaruno a kadakkelan a grupo ti foreign-trained physicians iti Estados Unidos [agarup 20,861 ti bilang wenno 8.7% iti amin a practicing international medical graduates iti US. Kannayonna, dagiti dentista a Fil-Ams a nagsanay iti Filipinas ti maibilang a maikadua met a kadakkelan a grupo ti foreign-trained dentists iti US. Iti impablaak nga artikulo ti Journal of American Dental Association, adda 11% ti amin a foreign-trained dentists a lisensiado iti Estados Unidos ket naggapu iti pagilian a Filipinas; ti pagilian nga India ti umuna iti ranggo nga addaan iti 25.8% iti amin a
foreign-trained dentists. Iti biang ti salun-at ken sabsabali pay a trabaho ti health professionals kas iti nursing, physical therapy, radiologic technology ken maedical technology, sinerrek payen dagiti Fil-Ams ken Filipino immigrants daytoy a trabaho.

Agawat pay ti pageskuelaan ti Amerika dagiti highly-calibrated a mangisursuro ken instruktor a Filipinos.

Iti Imigrasion
Agtalinaed a dagiti Filipinos ti maysa kadagiti kadakkelan iti bilang ti grupo ti imigrasion a nagturong iti Estados Unidos nga addaan iti 80,000 a bilang iti tunggal tawen. Agarup 75% ti bilang dagiti maesponsor wenno mapetisionan a kameng ti pamilia wenno kaasitgan a kabagian ti American citizens, idinto a dagiti sabsabali ket employment-oriented. Mayorya kadagitoy a bilang iti mapetisionan ti agturong iti California, sarunoen ti Hawaii, Illinois, New York, New Jersey, Washington, Floridam Louisiana, Texas, Colorado, Nevada, Alaska, Maryland ken Virginia.

Napadasan met dagiti Filipinos ti nabayag a panakaited kadakuada iti visa. Adda pagannurotan ti United States Citizenship and Immigration Services [USCIS] nga agited iti visas kadagiti saan a makipagili a kameng ti pamilia ti maysa a US cititizens, katipon ti preperensia maibasar iti kaasideg ti mapetisionan iti agpetision. Mabayag met ti panaguray wenno panakaugag ti nagan dagiti dadduma a non-citizen a kabagian ti US citizen ti naganda iti imigrasion.

Dual Citizenship
Kas resulta ti panakaipasa ti Philippines Republic Act No. 9225, wenno maawagan pay iti "Citizenship Retention and Re-Aquisition Act of 2003," mabalin a pilien ti Filipino Americans ti dual citizenship iti agpada nga Estados Unidos ken Filipinas. Ingunamgunam a kiniddaw dagiti Overseas workers ken ni Presidente Gloria Macapagal-Arroyo daytoy a paglintegan tapno makipasetda nga agbotos iti aniaman nga eleksion iti Filipinas

Idi tawen 2004, agarup 6,000 a tattao ti nagbalin a dual citizens ti Filipinas ken Estados Unidos. Naguyugoy daytoy nga akta ti adu a Fil-Ams tapno agpuonan iti Filipinas- gumagatang iti lote, agbotos iti eleksion iti Filipinas , agretiro ken makipartisipar iti panangitandudo ti bandera ti Filipinas.

Dagiti Selebrasion
Kaugalianen dagiti Fil-Ams a rambakan ti maysa a pasken wenno okasion kas iti buniag, panagkasangay, pamunpon, naisangsangayan nga aldaw wenno pakasar. Dagitoy a selebrasion ket kabuyogna ti dakkel a padaya kas nagbalinen a tradition dagiti Filipinos- adda dita ti nagduduma a potahe kas iti adobo, lumpia, pancit, lechon ken tinuno nga ikan. Kadagiti Ilocano, saan a malipatan ti pinapaitan. Maidasar met ti mainum a San Miguel Beer, Ginebra San Miguel Gin, La Tondena Rum, Matador Brandy, Emperador Brandy, Lambanog, Tuba, Basi ken Arak ti basi.

Iti komunidad dagiti Fil-Ams, kaay-ayoda dagiti selebrasion nga adda pakainaiganna iti kulturatayo a Filipino. Maipabuya dagitoy iti porma ti fiesta, street affairs ken parada. Kaaduan a selebrasion ti marambakan iti bulan ti Mayo bayat ti Asean Pacific American Heritage Month, Flores De Mayo, Barrio Fiesta, kdpy.*


[repost- copyrightby.rudy.ram.rumbaoa]

Mar 6, 2010

Rinambakan ti umuna a Fil-Am Official iti Hawaii ti maika-97 a panagkasangayna


Ni Rudy Ram. Rumbaoa


KAHULUI, Maui- Naawagan kas "iconic figure," ti umuna a Filipino-American a nangabak ti eleksion iti opisina ti County ti Hawaii, ken iti Estados Unidos. Umuna a nabotosan ni Richard "Pablo" Caldito idi 1956 ken naipatugaw kas Board of Supervisors ti County ti Maui, isu pay ti forerunner iti council-mayor a binukel ti gobierno.

Rinambakan ni Tata Richard wenno "Pablo," ti nalatak a birngasna ti maika-97 a panagkasangayna itay napalabas a bulan ti Pebrero. Daytoy nga aldaw ti kararagsakan kadagiti amin nga aldaw ni Tata Richard gapu ta nakipagrambak met kenkuana dagiti uppat nga annakna da Ivy, Richard, Jr., Charlene Rodriguez, ken Iola Balobar, karaman dagiti dadduma a miembro ti pamilia Caldito, ken agarup 50 a nasinged ken nabayagen a pagayamna iti Cafe O Lei iti The Dunes, Maui. Indawat dagiti bisita ni Caldito ti naimbag a salun-at ken manayon pay a panagbiagna.

Dagiti bisita ni Caldito: Maui County Council Chair Danny Mateo, Council Member Joe Pontanilla, "Leo" and Virgie Agcolicol, Felipe and Norma Barroga, retirado a hues ken agdama a miembro ti University of Hawaii Regent Artemio Baxa, John and Geri Enriquez, Jovito Pahed, ken Tony Ramil.

Ni Tata Caldito ti maysa kadagiti tallo a nabatbati a Maui political leaders a nabotosan nga opisial idi 1956. Dagiti dua isu da Elmer F. Cravalho, a nangabak ti re-election iti territorial House of Representatives ken isu ti kangatoan a nakagun-od iti botos kadakuada nga innem a kandidato iti Balay Pagpandayan Linteg; ken ni S. George Fukuoka, a nangabak iti terrirorial Senate ken nakagun-od iti kangatoan a botos iti biang ti senado ken nangilampaso iti reelectionist John G. Duarte.

Dagidi nabotosan a County Officials isu da Eddie Tam, chairman ken executive officer, ken Board members: Louis Ambrose, Caldito, Goro Hokama [Lanai], Harry Kobayashi, Soon Oak Lee [Molokai], Manuel Molina, Tom Tagawa, ken Hannibal Tavares.

Nailayon met da Harold L. Duponte, County attorney; G.N. Toshi Enomoto, clerk; K.K. Kam, tesorero, ken Manuel Roidriguez, auditor.

Malagip a ti eleksion ket "partisan" ken amin a nabotosan nga opisial ti County ket puro taga-partido ti Democrats malaksid la ken ni Tavares, maysa a Republican, a nakagun-od iti kangatoan a bilang ti botos kadagiti nangabak a kandidato ti Board.

Karaman a nangabak a para iti territorial House of Representatives da Yadao Yoshinaga [D], Marquis Calmes [Republican], E. Percy Lyndgate [R], Rey Adams [D], ken Barney Tokunaga [R].

Nagserbi ni Tata Caldito iti 15 a tawen idiay Board of Supervisors ken iti Konseho ti County. *
__________________________________

Dec 17, 2009

"Rice Festival Week," maangay iti Maui, Hi


Ni Rudy Ram. Rumbaoa


KAHULUI, Maui- Opisial nga indeklara ni Maui Mayor Charmaine Tavares ti Disiembre 14-20, 2009 a kas "Rice Festival Week," umuna a panakarambakna iti intero a County ti Maui ken uray pay iti sibubukel a Hawaii.

Sagundayen ti proklamasion, kuna ni Tavares a "Dakkel ti akem ti bagas/innapuy iti kaaduan a pagpagilian gapu iti kinabaknang ti nutrision nga ipaayna ken nagbalin daytoy a pondasion ti ekonomia iti intero a komunidad." Innayon ti mayor a "Ti innapuy ti kangrunaan a pagbiag ken taraon ti tao."

Da Mrs. Norma Barroga, agdama a presidente ti Binhi at Ani ken Tony Ramil, Festival general manager, ti nangawat ti proklamasion manipud iti mayor iti Mayor's Lounge, Kalani  O Maui Building, Wailuku, idi Disiembre 1. Ti met la Binhi at Ani ti mangirubbuat ken mangidaulo ti Filipino community iti daytoy a pasken.

Iti Disiembre 20, maudi nga aldaw ti selebrasion, maigiddan met a marambakan ti anibersario dagiti immuna a sakada iti Hawaii. Malagip a simmanglad dagiti kaunaan a Filipinos iti pantalan ti Honolulu idi Disiembre 20, 1906 tapno agtrabaho kadagiti plantasion ti kaunasan ken kapiniaan,  ken naidestinoda iti Ola'a Plantation idiay Big Island. Simmangpet ti naudi a bansada dagiti sakada iti Hawaii idi 1946. Kaaduan kadagitoy ti mannalon idiay Kailukoan.

Iti rabii ti Disiembre 20, maangay ti Rice Festival dinner and program iti Binhi at Ani Community Center babaen iti panangidaulo dagiti opisial ken miembro ti Binhi at Ani. Ti tema ti selebrasion: "Panagrambak ti Pamilia, Komunidad, ken Kultural a Tradision."
_______________________________