Showing posts with label Ammuen Pay Daytoy. Show all posts
Showing posts with label Ammuen Pay Daytoy. Show all posts

Jul 30, 2024

Ammuen Pay Daytoy, Ne: Ti Puor iti Lahaina idi 1919






ADU ti saan a makaammo nangruna dagiti ubbing, agtutubo wenno lokal ken gangannaet a turista a bumisbisita iti lugar ti pakasaritaan ti Lahaina nga adda immun-unan a napasamak a puor sakbay ti Agosto 8, 2o23.

Nalabit, dagiti laengen nataengan a kas kadagiti Hawaiian, Haole, Hapon, Portugese, Filipino ken dadduma pay a nagkauna a puli a nagindeg iti Hawaii idi un-unana a panawen ti makaammo, makalagip wenno nanglagip iti napasamak nga uram idi tawen 1919 a kapada ti kinaranggas a puor itay napalabas a tawen.

Idi tawen 1919, linamut ti apuy ti sentro ti ili iti Lahaina a nagpababa agingga iti Front Street a dimmappuan ti agarup treinta a pasdek negosio no maikumpara iti nganngani sangagasut a pasdek [ti negosio] a napukaw iti apagdarimat itay kallabes nga Agosto 8 nga uram. Mapattapatta a kagudua laeng ti papulasion ti Lahaina idi 1919. Adda agarup 7,ooo a residente ti agindeg iti dayta a tawen a nairakurak iti datos ti 192o census. Adda maipagarup a kagudua ti 13,ooo a residente ti naidukomento iti Lahaina 2o2o census.



Agkaarngi ti naindaklan a puor iti Lahaina idi 1919 ken ti Agosto 8, 2o23

Agarup adda 25 a Volunteer firefighters ti nangisakrifisio ti biagda a nanglaban iti apuy idi 1919, ken adu ti nakalasat iti dayta kadakkelan ken kaunaan pasamak a puor iti Maui. Adu ti napukawan iti pagtaengan daydi a panawen. Adda naobserba a pagkaarngian iti napasamak itay napalabas a tawen ken ti 1919 a puor: agpada a kaaduan nga usar iti nabangon a pasdek idi ken ita ket kayo a mangpaneknek ti kinarisgo no adda peggad a dumteng; natuang, naperdi ken napuoran dagiti light materials a banag nga aramat ken napugsat dagiti kable ti komukasion a rason nga awan naawat a tulong iti ruar ti Lahaina ken kadagiti pagilian iti lubong nga agpanggep a sumaranay idi. Ngem iti agpada a kaso, timpuar dagiti bannuar bayat ti uram, adda met dagiti ebidensia a mangibaga a human error ti napasamak. Timmaud dagiti pammabasol ken pammabalaw no asino ti akin-responsibilad kalpasan a nasebsaban ti apuy, no apay a kasta laengen ti kadakkel ti perdision, nangruna iti pannakaipatli ti biag.



Ti paggiddiatan
Adda maysa a banag a dakkel ti paggiddiatan ti daytoy dua a napasamak a puor iti Lahaina. Awan nairakurak a nairisang wenno napukaw ti biagna idi 1919 gapu ti kinaalibtak dagiti kameng ti pannakabagi iti linteg a nagsakrifisio a namalaybalay iti ili a nangipakdaar ken nagipukkaw a dumteng ti peggad kadagiti umili nga usar laeng ti kabalio a naglugananda. "Dakkel a tulong dayta no naaramid met idi napasamak ti uram. Arigna a di inkankano ti kaaduan dayta a pakdaar dagiti kameng ti polisia, bombero ken boluntario," kuna ni Theo Morrison, executive director of the Lahaina Restoration Foundation, maysa nga organisasion a nangpreserba ti lagip iti napasamak a puor idi tawen 1919."Idi makita a saan nga ang-angaw dayta a puor, isu metten ti panagbalaw dagiti tao ngem naladawen. Naginad ti panaggunay ken yaadayo iti lugar a napuoran gapu ti kaalisto ti apuy a nagwaras sa pay la naangin kadaydi nga aldaw. Arigna impierno ti kadarang iti aglawlaw. Awan lusotan," innayon ni Theo.

"Maysa pay a paggiddiatan isu ti kalawa ti perdision a linamut ti apuy," kuna met ni historiador Peter Young, dati a nangidaulo ti Department of Land and Natural Resources ken nagsurat iti maipanggep ti napasamak a puor idi 1919. Kunana, naobserbana a saan nga agpada iti lokasion ti napasak a puor ngem dakdakkel nga amang ti napukaw ti kaudian-- ad-adu ti nairisang a biag ken dimmapo a pasdek negosio ken balbalay.

Nangrugi ti puor ti 1919 iti maysa a pagtagilakuan ti prutas iti paset ti sentro ti distrito ti komersio iti Lahaina, bigat ti Domingo, Enero 15, 1919. Awan ti nadlaw a napigsa nga angin idi sakbay ti uram no di ket ti gagangay a palayupoy ti angin, ngem alisto ketdi a nagkayamkam ken nagwaras ti apuy kadagiti pasdek tunggal nagkorosan ti kalsada iti Front ken Dickenson Streets.

Gapu ta saan pay nga organisado ken kurang ti ramit nga usaren ti Fire Department idi 1919 a mangsebseb ti apuy, timmulong ti agarup 1,000 a nagboluntario a katao iti kumporme a masalbar kadagiti pagtagilakuan a linamut ti apuy. Kalpasan ti puor, naipatengnga iti kalsada ti sangagabsuon a naperperdi a lako. Dagiti dadduma, naipatengnga iti taaw.



Dagiti nakalasat a pasdek iti 1919 a puor
Maysa ditoy ti Pioneer Inn Hotel, a mapapati a maysa kadagiti kaduogan a pagdagusan iti Hawaii. Ti Lahaina Store, maysa met a nalatak nga shopping destination a nabaliwan ti naganna ita iti Fleetwood, ken ti Baldwin House, maysa a kaduogan a pasdek ken pagtaengan dagiti misionario iti isla.



Napasamak ti nakaam-ames a puor idi Agosto 8, 2o23. Mapapati nga immuna a napuoran ti Kula Upcounty iti bigat ti Martes ti dayta met la petsa. Idi umaldawen, naipadamag laengen a mapupuoran ti Lahaina agingga a linamut ti apuy ti agarup apagkatlo a kalawa ti ili. Ti pagsiddaawan, nakadanon ti apuy iti umabagatan a paset ti Maui, iti Kihei.

Iti kaudian a datos ti bilang dagiti pimmusay iti daytoy a trahedia iti West Maui, adda 102 a tao ti kumpirmado a natay a nagtitiponan ti nagduduma a puli a pakairaman dagiti pada a Filipino. Adu dagiti napukawan iti pagtaengan ken pagtrabahuan. Immakar dagiti dadduma idiay Mainland America gapu ti amakda nga amangan no mapasamakto manen daytoy di kalipatan ken naranggas a puor iti pakasaritan ti Maui, nangruna iti Lahaina.
.
.
.
.
.
Ti Puor Iti Lahaina Idi 1919
Rudy Ram. Rumbaoa
dagitikappurosadamdamagitihawaii.blogspot.com

[nabulod dagiti ladawan a nausar iti Lahaina Strong ken Lahaina History]

#lahainastrong #lahainahistory




May 6, 2024

Ammuen pay daytoy,



Mapapati a daytoy ti kaduogan a ladawan a naala iti Market Street iti  Wailuku, Maui idi 19o5. Nakasango iti abagatan ti nagala kadaytoy a ladawan. Dagiti laeng kabalio, kalesa ken karison ti mabalin pay laeng a pagluganan idi. Awan pay uray maysa a Model T, ngem makita ti kable ti telepono para iti Wailuku Sugar.
.
.
.
.
.
Ammuen Pay Daytoy
Rudy Ram. Rumbaoa
dagitikappurosadamdamagitihawaii.blogspot.com

[nabulod ti ladawan a nausar] 


Ti Fundador ti Barrio Fiesta iti Maui


Ammuen pay daytoy, ne.
--

Ti fundador ti Barrio Fiesta iti Maui --ni NANCY ANDRES, isu ti nangirugi ken nangisungsong iti panangrambak ti Barrio Fiesta iti Maui idi Mayo 31, 197o.

Malaglagip latta ti sibubukel a
komunidad dagiti Filipino iti Maui ni Nancy gapu ti liderato nga impaayna ken panangyasidegna, no di ket pay pinagkaykaysana dagiti Filipino tapno maitandudo ken mapagtalinaed [mapreserba] ti nabaknang a kultura [dagiti Filipino] iti Maui.

Marambakan ti Maika-55 nga Anibersario ti Barrio Fiesta iti Maui no Mayo 24-25, 2o24 iti Binhi at Ani Filipino Community Center, Kahului, Maui.
.
.
.
.
Ti Fundador ti Barrio Fiesta iti Maui
Rudy Ram. Rumbaoa
[nabulod ti ladawan a nausar ken ni Alfredo G. Evangelista]

May 30, 2023

Ammuen Pay Daytoy, Ne: Pintor met ni Sabado




FIRST PHOTO: Wailuku artist Phil Sabado signs prints of his work Wednesday morning in Wailuku. Sabado was born and raised on Molokai. He primarily works in oils and watercolors, but is also a celebrated muralist.

SECOND PHOTO: Christine Sabado places a sign outside Sabado Galleries while opening the Market Street business Wednesday morning in Wailuku. Sabado said she and artist husband Phil Sabado have been working in Wailuku for 35 years, but their move to the former Brown-Kobayashi storefront near Iao Theater has taken the gallery to a new level. She said she is excited both by Wailuku’s future and its touch with its past. “I congratulate people when they come to Wailuku,” she said. “I say, ‘congratulations, you are now in our local marketplace.’ Paia and Makawao are also walking towns, but Wailuku is different.” She said her daughter, Jackie Sabado, also has a shop on Market Street. Paradise Now features Jackie Sabado’s handmade fabrics and prints. “I’m excited for Wailuku,” Christine Sabado said.

 

[nabulod dagiti ladawan a nausar ken ni Matthew Thayer ti The Maui News]

[dagitikappurosadamdamagitihawaii.blogspot.com]






 

Aug 11, 2008

Isuda Dagiti Maipanakkel a Fil-Am Officials iti Hawaii

Ni Rudy Ram. Rumbaoa




DAKKEL a pakaidayawantayo a Filipino.

Maysa a puli, maysa a timek iti gangannaet a daga.

Gapu iti di mabilbilangen a kontiribusion ti naaramidan a pagimbagan ken serbisio publiko iti komunidad, ipaayan ti National Federation of Filipino American Association wenno NaFFA ti maysa a pammibigbig ken panagraem kadagitoy a Fil-Am a nabotosan a nagserbi ken madama pay laeng nga agserserbi iti estado ti Hawaii no Agosto 22, 2008 iti Fort De Russy Ballroom, Hale Koa Hotel iti Waikiki, Oahu, Hawaii.

Kasano a naluktan ti political arena kadagiti Fil-Am iti Hawaii?
Idi katengngaan ti tawen ti 1950, dua dagiti Fil-Am ken maibilang a pioneers iti politika ti nanglukat ti dalan para iti political arena dagiti Filipinos iti Hawaii: isu da Peter Aduja ken Richard Caldito, Sr. Idi tawen 1954, ni Aduja, maysa a Republican manipud iti Hilo, Hawaii, ti kaunaan a Filipino iti Hawaii ken Estados Unidos ti nangabak iti elective post iti House of Representatives. Ni Caldito, Sr. ti kaunaan manipud iti Filipino ancestry ti nabotosan kas Supervisor ken Councilman idi tawen 1956. Isu pay ti kaunaan a Fil-Am Democratic candidate a nabotosan iti pampubliko nga opisina iti Estados Unidos. Ket gapu iti nagapuanan dagitoy dua a pioneers, simmurot dagiti dadduma a kadaraan iti tugotda tapno maibilang nga opisial a nabotosan ken naipatugaw iti takem iti estado ti Hawaii.

Asino dagitoy 23 a Fil-Am Elected Officials iti Hawaii?

Iti State Senate:
*Sen. Robert Bunda- ibagianna ti maika-22 a distrito manipud idi 1994 ken iti naminsan, nagserbi daytoy kas Senate President. Ni Abunda ti kaunaan a Filipino American a nakagun-od iti kina-presidente ti state legislature iti Estados Unidos. Dagiti naglabas a nagtakemanna, miembro iti Hawaii House of Representatives manipud tawen 1983 agingga iti 1994. Nagturpos daytoy iti Taxas Wesleyan College ken nagadal pay iti University of Texas. Nayanak ken dimmakkel ni Abunda iti Waialua. Nayasawa ken ni Gail.

*Sen. Will Espero- anak ni Victor Espero ti Bacnotan, La Union ken Paulina Calip Espero ti Santiago, Ilocos Sur. Retirado iti US Navy ti ama ken retired Registered Nurse ti ina ni Will. Nayanak ni Will idiay Yokosuka, Japan ken nagnaed daytoy iti akin-daya ken akin-laud a paset ti Estados Unidos, iti pagilian a Cuba ken Italy. Nagadal ni Will iti finance ken property management. Nagserbi pay ni Will ken ni Mayor Frank Fasi kas mangidaulo ti Oahu Neighborhood Board System. Ti ambisionna: "Agbalin nga umuna nga Amerikano iti Filipino ancestry iti US Senate."

*Sen. Lorraine Rodero Inouye- nayanak ken dimmakkel iti Big Island iti 1917 a sakada Santiago Rodero ken Antonia Martinez Vegas. Nangrugi ti political careerna idi tawen 1974 babaen iti panakadutokna tapno agserbi kas miembro ti Hawaii County Planning Commission. Idi 1988, nabotosan ni Inouye tapno ibagianna ti First Senatorial District of the Big Island iti Hawaii State Legislature. Idi 1977, maysa ni Inouye a recipient of the government award babaen iti panangited ti United Filipino Council of Hawaii [UFCH]. Naawatna pay ti Outstanding Community Service Award manipud iti Filipino Women's Civic Club idi tawen 2005. Nayasawa ken ni Vernon Inouye.

*Sen. Donna Mercado Kim- ibagian ni Kim ti maika-14 a Senatorial District manipud 2000. Ngem sakbay a nagbalin a senador ni Kim, nagkonsehal iti Siudad ken County ti Honolulu manipud 1985 agingga iti 2000 ken isu ti chairperson ti Council Zoning Committee ti 13 iti 14 a tawen. Nagturpos iti kina-Bachelor of Arts iti Washington State University ken nagadal pay iti University of Hawaii. Miembro daytoy iti nagduduma a propesional ken sibiko nga organisasion.

*Sen. Ron Menor- ibagian ni Menor ti maika-17 a Senatorial District manipud tawen 2000. Nagserbi iti State House manipud tawen 1982 agingga iti 2000. Nagturpos daytoy iti Georgetown University Law Center ken ti University of California, Los Angeles. Nayanak ken dimmakkel iti Hilo, Hawaii, ken nayasawa ken ni Patricia Ann Menor. Ti apong a lakay ni Menor, ni Angelo Menor, nagimigrante iti Hawaii manipud iti Filipinas idi tawen 1925 tapno agtrabaho iti Olla's plantation iti isla ti Hawaii.

Iti State House of Representative:
*Rep. Della Au Belatti- ibagnna ti maika 25 a distrito. Miembro ni Belatti iti House of Committees of Finance, Health, Human Services angd Housing, and International Affairs, Filipino Caucus, Women's Caucus, Keiki Caucus, Kupuna Caucus ken Climate Change Caucus. Nagturpos ti J.D. iti William S. Richardson School of Law, University of Hawaii.

*Rep. Lyla Berg, Ph. D.- maysa nga edukador, mangisursuro, coordinator iti student activities, middle school principal ken instructor iti College of Education ti University of Hawaii-Manoa ken iti Kapiolani Community College sakbay a nabotosan kas State Representative iti maika-18 a distrito idi 2004. Isu ti nangbangon ken pasado a presidente ti Kids Voting Hawaii. Nalatak ni Lyla kas "Miss Lyla" iti programa ti telebision a ""Voices and Wings." Iggemna ti titulo a Ph.D. iti Eduaction manipud iti Union Institute ti Cincinnati, Ohio. Maysa daytoy a single mom. Iti agdama, isu ti vive-chair ti House Education Committee.

*Rep. Rida cabanilla- ibaginna ti maika 42 a distrito. Maysa a rehistrado a nars. Miembro daytoy kadagiti sumaganad a komite: Human Services [Vice-Chair], International Affairs [Vice-Chair], Education, Health and Higher Education. Nayanak ni Cabanilla iti Filipinas ken residente iti Hawaii manipud idi tawen 1970. Naturposna ti BS in Nursing iti University of Hawaii-Manoa ken nagatendar iti Command & General Staff College of the US Army.

*Rep. Lynn Finnegan- nabotosan iti House of Representatives idi tawen 2002 ken dinutokan dagiti padana a mangibagi nga agbalin a Minority Leader idi 2005. Idi agdama, agserserbi daytoy iti Education, Higher Education, Public Safety ken Legislative Management committees. Dagiti naawatna a pammadayaw karaman kas maysa iti Hawaii Ten Oustanding Filipinos Young Women of 2004, Hawaii Medical Association's 2006 Legislature of the Year, ken Parick Henry Award manipud iti Nation Guard Association idi 2007. Iti kaudian a panagbiahena a nagturong iti Filipinas ti nangistablisar iti sister-state relationship iti probinsia ti Isabela ken Cagayan ti nangipakitaanna ti naregget a panagserbina iti komunidad ti Filipino.

*Rep. Michael Magaoay- ibagianna ti maika-46 a distrito. Miembro ni Magaoay iti Governor's Turtle Bay Advisory Working Group ken linapdanna ti panagserra ti Kahuku Hospital ken Poamoho Camp. Miembro iti sumaganad a komite: Legislative Management, Energy & Environmental Protection, Finance; ken Water, Land, Ocean Resources and Hawaiian Affairs. Isu ti chairmain ti Filipino Caucus. Nayanak ken dimmakkel iti Waialua Sugar Plantation camp. Nagturpos iti kina-Bachelor of Science degree in Electrical Engineering iti University of Hawaii, School of Engineering iti Manoa. Nayasawa ken ni Felimar Visaya ti Eleele, Kauai.

*Rep. Joey Manahan- nayanak iti Makati City, Filipinas. Nagimigrante ti pamilia ni Joey iti Estados Unidos idi agtawen daytoy iti sangapulo. Nagturpos iti Bellamine College Preparatory iti San Diego, California, ken iggemna ni kina-Bachelors degree iti Communications iti University of Hawaii-Manoa. Nagtrabaho idi kas legislative aide ken ni State House Rep. Dennis Arakaki, State Sen. Donna Mercado Kim ken Mayor Mufi Hannemann. Nagserbi pay kas administrador para iti State of Hawaii Office of Elections. Bayat ti umuna a terminona, nakaur-or iti agdagup 45 a milion a doliar ken balligi a naipasa ti paglintegan tapno agbalin ti bulan ti Oktubre kas Filipino-American Histtory Month.

*Rep. Kimberly Marcos Pine- isu ti Assistant Minority Leader iti House of Representatives. Nabiit pay nga innaganan ti Filipina Women's Network ni Pine kas maysa kadagiti 100 Most Influential Filipina Women iti America gapu ti trabahona iti public policy. Sakbay a naipatugaw idi 2004, isu ti kangatoan ti ranggo iti Filipino appointee iti State House of Representatives kas Director of Research no sadino nga imbutaktakna ti agdagup 600 a milion a doliar a busbusbosen ti gobierno. Nagturpos iti University of California-Berkely. Nagimigrante ti pamilia ni Pine iti Estados Unidos idi nasapa a tawen ti 1900 tapno mangged iti plantasion ti Hawaii.

*Rep. Roland Sagum III- ibagianna ti maika-16 a distrito a pakairamanan ti West Kauai ken Nihau. Nagserbi iti committees ti Finance, Energy and Environmental Protection; ken Water, Land, Ocean Resources and Hawaiian Affairs. Paglainganna ti urban ken regional land use planning, real property acquisition ken project design and land development. Naturposna ti kina-Bachelor of Arts Degree iti Chaminade University, nagatendar pay iti University of Hawaii, School of Medicine idi tawen 1981 iti babaen ti Imi Ho Ola Program and Hawaii Institute of Real Estate idi 1999. Agtutuloy ti boluntario a panagserbina kadagiti nagduduma a komite ken mangibagi iti board para iti interes ti komunidad ti Kauai.

*Rep. Alex Sonson- ibagianna ti maika-35 a distrito. Nayanak ni Sonson iti Ilocos Sur kada Dios-ti-aluadna Alfonso ken Adela Sonson. Nagimigrante ti pamilia Sonson iti Waipahu iti agtawen ni Alex iti sangapulo. Naawatan ti Associate of Arts degree manipud iti Leeward Community College idi 1984. Intuloyna ti nagadal iti California State University iti Fullerton no sadino a nagun-odna ti kina-Bachelor's degree iti Business Economics. Immakar iti Chicago tapno agadal iti kina-abogasia ken nayawat kenkuana ti pammadayaw J.D. manipud iti IIT Chicago-Kent College of Law idi 1993. Nayasawa ken ni Jennifer Correa.

Iti Siudad ken County ti Honolulu:

*Romy Cachola- karaman iti naaramidan ni Councilmember Cachola ti Golf Course 5 & 6 Settlement, Waikiki Revitalization, Enterprise Zone program para iti Urban Honolulu, nayon a pundo para iti FilCom Center ken Hawaii Filipino Centennial Commission. Idauluanna ti panakaidanon iti publiko ken agukkon ti input ti sumagmamano a singasing alternatibo para ti mass transit system. Nagturpos ti Bachelor of Lawa iti Manuel L. Quezon University iti Filipinas. Nagserbi iti State House of Representatives iti walo a nagsasaruno a termino manipud 1984 agingga iti 2000. Nayasawa ken ni Erlinda.

*Donovan Dela Cruz- nayanak ken dimmakkel iti Wahiawa. Nagun-od ni Donovan ti kina-Bachelor's degree in Journalism and Communications iti Unibersidad ti Oregon. Isu ti apoko ni Rodrigo ken Feliciana Dela Cruz- imigrante manipud iti Filipinas a nagtrabaho iti kapinyaan ti Wahiawa. Nabotosan ni Donovan iti Honolulu City Council idi 2002 iti tawenna a 29. Iti agdama, isu ti chair ti Public Health, Safety and Welfare Committee. Malaksid ti serbisiona iti gobierno, isu ti co-author ti "Tha Okazu Guide," "The Puka Guide" ken "The Omiyage Guide," tallo a libro a ti gagemna ket tapno mapreserba ti kultura ti lokal Hawaii ken mangital-o ti lokal a restauran ken negosio.

*Nestor Garcia- nagsapata idi 2003 ken nabaliwan a nailayon para iti uppat a termino idi 2004. Iti agdama, isu ti chair ti Transportation and Public Works Committee ken Floor Leader ti konseho. Nagserbi pay kas Budget Executive Matters, and Zoning committees. Nagung-odna ti kina-Bachelors degree ti Journalism iti Niversity of Hawaii. Mabigbig ni Nestor manipud iti trinabahona kas on-camera investigative reporter iti KHON manipud 1981 agingga iti 1991. Nayasawa ni Nestor ken ni dati Karen Mun.

County of Hawaii Councilmembers:
*K. Angel Pilago- maysa a Filipino-Hawaiian ken Caucasian ancestry. Nayasawa ken ni Nita. Nabotosan ken naipatugaw iti Hawaii County Council idi 2004, ken nabaliwan a nailayon idi 2006. Iti agdama, isu ti vice-chair ti konseho ken Planning Committee Chair. Plano ni Pilago iti agpaidasig para Mayor ti Hawaii County. Beterano ti gubat ti Vietnam, naawatna ti Silver Star for Heroism. Balligi ti panangidaulona ti dua a kaso iti Korte Suprema tapno mapatalgedan ti environmental justice ken human rights. Gapu iti legal ken trabahona iti politika, naawatna ti nagduduma a pammadayaw ken pammigbig.

*Dominic Yagong- nayanak ken dimmakkel iti Honokaa ken agdama nga agnaed iti Kalopa karama ti asawana, ni Hilda. Nagserbi iti Hawaii County Council manipud tawen 1996 agingga iti 2002, isu ti chair ti agpada a Public Works ken Parks, ken ti Environmental Management Committee. Napili pay daytoy kas Chair ti Finance Committee and Vice Chair of the Planning Committee ken Public Works Committee.

County of Maui Councilmenbers:
*Danny Mateo- maipannakkel nga anak ti sakada, ni Inocentes Mateo. Ipanakkel ni Danny ti kina-Filipinona. Nagturpos iti University of Hawaii iti Hilo, nagnaed iti Molokai a kaduana ti asawana, ni Clarissa. Isu ti mangiturturong ti Tropical Rent-A-Car ken Rent-A-Mule. Nakikameng iti Maui County kas Molokai Economics Development Coordinator. Nagtrabaho ni Danny para iti Kaluakoi Resort kas Public Relations & Community Liaison. Iti agdama, ni Danny ti Vice Chair ti Maui County Council. Nagserbi kas miembro ti konseho ken imbagianna ti Molokai ti pito a tawen.

*Joseph Pontanilla- dimmakkel ni Joseph iti kampo ti plantasion ti Puunene ken Maui, anak ti maysa a sakada. Nagturpos iti Maui schools ken nakompletona ti akemna iti United States Army. Nagtrabaho ni Joe iti GTE Hawaiian Tel iti 34 a tawen, ken nagretiro kas general manager idi 1997. Nagserbi kadagiti nagduduma a civic boards ken charitable organizations. Immuna a nabotosan idi 2002. Iti agdama, makompletonan ti maikatlo a termino ti panagserbina iti Maui County Council kas mangibagi iti distrito ti Kahului. Isu ti chair ti Budget and Finance Commitee. Nagserbi pay kas tesorero ti Hawaii State Association of Counties. Nayasawa ken ni Charlotte.

County of Kauai Councilmember:
*Shaylene Iseri-Carvalho- nagturpos iti Unibersidad ti Colorado ken UH Richardson School of Law. Nagpraktis iti kina-abogasia iti agarup beinte a tawen. Idi 1999, nadutokan iti kinahues. Kas miembro ti konseho, natenneb daytoy iti diverse ken kadagiti napapateg nga ekspiriensa iti uppat a tawen, ibagianna ti indigent clients ken deputy prosecuting attorney iti walo a tawen. Nayanak ken dimmakkel iti Kauai.

Iti State Board of Education:
*Mary J. Cochran- isu ti maikapito kadakuada a sangapulo ket dua nga annak da Guillermo ken Maxima Ribucan a nagimigrante iti Hawaii idi tawen 1926. Ti kinapudnona, importante ti migrasion kenkuana ta ditoy a marikna ti pateg manipud kadagiti nagannakna: "Ti panangirisgo ti nagannak ti biagda para laeng iti pagimbagan dagiti annakda." Nagturpos iti Chaminade University ti Honolulu. Naawatna ti lisensiana kas abogado kalpasan a nagturpos iti Richardson School of Law iti Unibersidad ti Hawaii. Naipatugaw iti Hawaii State Board of Education idi 2002. Dua ti annakna ken lima ti appoko ken maysa ti apokona ti tuod.*

Mar 7, 2008

Iti Maui: Eskolar Dagitoy nga Agtutubo

Ni Rudy Ram. Rumbaoa



SAAN a pagduaduaan nga importante ti edukasion kadagiti Filipinos. Iti daytoy a tawen, naipaayan iti scholarship program dagiti estudiante ti Maui tapno ad-adda a maikkanda ti gundaway nga agbasa ken agballigi a mangtun-oy iti arapaapda. Adda misyon ditoy dagiti nagduduma nga organisasion, dagiti pamilia ken indibidual a tattao tapno ipaay ti tulong a pangsuporta kadagitoy nga eskolar. Naimbitaran ngarud dagiti organisasion a mangisumite kadagiti bukod a scholarship information.

Ti Bantay Association of Maui [BAM], ni Marietta P. Carino ti Presidente, Education & Scholarship Committee- Lilia valdez, Chair; Aurora Papagayo, Co-Chair. Iti agtinawen a pammadayaw ken panangbigbig ti asosasion kadagiti estaudiante a naangay idi Hulio 18, 2007 iti Kahului Community Center, innem dagiti taga-Maui High School scholars manipud iti pamilia ti BAM ti nakaawat iti sinag-lima gasut ket limapulo a doliar para iti pagrugian a pundo ti inda panagbasa iti kolehio. Dagitoy da: Marjorie Divina, balasang ni Marjorie Divina ti Kahului, sumrekto iti Community College of Southern Nevada tapno agadal iti kina-Nursing; ni Roosevelt Golino ti Kihei, anakda Mr. & Mrs. Reynaldo Golino, sumrek iti Washingto State University idiay Seattle tapno agbasa iti kina-Arkitekto; ni Dominic Paet, anakda Mr. & Mrs. Domingo Paet ti Kihei, sumrek iti Westwood College idiay California tapno agadal iti Visual Communications; ni Philipp Myles Paranada, anakda Mr. & Mrs. Celedonio Paranada, Jr. ti Kahului, agadal iti Maui Community College para iti Culinary Arts Program; ni Matthew Parilla, anakda Mr. & Mrs. Henry Parilla ti Kahului, agadal iti kurso a kina-Mechanical Engineering idiay California Polytechnic University ken Rose Pigao, balasang da Mr. & Mrs. Paul Pigao ti Kahului, mapan agbasa idiay Portland University of Oregon iti kurso a Graphics Designer. Tapno magun-od ti scholarship program, masapul a miembro ti pamilia iti nasao nga organisasion.

Ti Dance International Productions [DIP], ni Madelyn Pascua ti Presidente. Iti panakalukat ti umuna a pakaipaayan ti scholarship program, naited ken ni dati a dance performer ken senior ti St. Anthony High School Michaella Pascua ti agdagup $1,000 ken ti titulo a "Miss International" gapu iti inaramida a mangital-o ti kultura ti Filipinas, Hawaii ken Tahiti babaen iti sala ken musika. Ti misyon ti DIP ket ikalawa ti panakaawat ken ti panakaital-o ti kultura kasta met nga itedna kadagiti dancers daytoy ti opurtunidad a makagun-od iti scholarship tapno agtultuloy ti edukasion a narugian kalpasan ti panagbasa iti high school. Naangay ti kaunaan nga Scholarship Award and Appreciation Day idi Setiembre 2, 2007 idiay Maui Beach Hotel- Ellair Ballroom.

Ti United Sons and Daughters of Ilocano Region [USDIR], ni Cirilo Sinfuego, Jr. ti Presidente. Gapu iti kaadu a managayat ken namangngaasi, impresentar ti USDIR ti 22 nga estudiante a makaawat iti scholarship programs iti "Reach for the Stars" Scholarship Night Banquet idi Setiembre 9, 2007 iti Ellair Ballroom ti Maui Beach Hotel.

Kas pagdayaw ken panagraem ken ni Cirilo Sinfuego, Sr., binangon ti USDIR ti The Good Sheperd Church Scholarships, tapno maipaayan ti pinansial a kasapulan dagiti estudiante para iti espesial a panaripato. Ti pammati ti USDIR: "Nupay mangrugi iti kinapakumbaba, karaman ti edukasion iti panagballigina." Uppat a sinag-sangaribu ti donasion ti Sinfuego Family kas pakalaglagipan ni "Cirilo Sinfuego, Sr. iti panangidaulo ken kontribusionna iti komunidad."

Dagiti naipaayan iti sinag-sangaribu a doliar nga scholarship isuda: Emmuanuel A. Agcolicol, kalikagumanna ti agbasa iti kurso a Nursing iti Maui Community College; Britney M. Latayada, balasang da Mr. & Mrs. Arthur Latayada ti Wailuku. Kayatna nga irugi ti kurso a Computer Graphics iti Maui Community College ken kayatna a maileppas idiay University of Nevada, Las Vegas; ni Paolo Panila, kaanakan ni Shirley Evangelista. Kalpasan a nalpasna ti Nurses Aide Program iti Maui Community College, plano ti baro nga ituloy daytoy a kurso iti Nursing iti isu met laeng nga eskuela. Ni Cristal Tadeo, nagsubli iti Maui kas single mother, kayatna nga ituloy ti agbasa iti Maui Community College iti kurso a Nursing.

Sangapulo ket walo dagiti nakaawat iti sinag-$750 nga scholarship. Isuda: Kayla Marie Aboy, balasang da ni Elmo Aboy ken Marivic Failano ti Kahului, agbasa idiay University of Hawaii-Manoa para iti kina-Nursing. Ashley Marie Clemente, balasang da Mr. & Mrs. Ernest Acidera ti Kahului, agad-adal ita idiay University Nevada in Las Vegas [UNLV], major in Hospitality Management. Ni Chris Ann Balasa, balasang da Mr. & Mrs. Junny Balasa ti Kahului ken agdama nga agad-adal idiay Mt. Saint Mary's College, major in Nursing; ni Lance Michael Cabanting, anak ni Caroline Rafanan ken Apoko ni Linda Rafanan. Kas paset ti undergraduate work academic plans daytoy, kayatna ti agadal iti University of Hawaii-Manoa para iti B.S. Biology degree, sarunoen ti graduate studies idiay Mainland tapno gun-odenna ti kina-Doctorate in Pharmacy degree. Ni Bradley Cacayorin ti Kahului, anakda Mr. & Mrs. Dennis Cacayorin. Maysa a sophomore iti University of Hawaii- Manoa ken major iti Elementary Education. Ni Brandon Cacayorin, anakda Mr. & Mrs. Dennis Cacayorin. Maysa a junior iti University of Hawaii-Manoa, ken majoring iti Travel INdustry Management; ni Lareina Cajigal, balasang da Mr. & MRs. Ferdinand Cajigal ti Kahului, agdama nga agbasbasa iti University of Nevada in Las Vegas para iti B.S. Biology ken undergraduate degree a Pharmacology.

Ni Chelsea Davis, balasang da Mr. & Mrs. Curt Davis ti Pukalani, agdama ita nga agad-adal idiay Hawaii Pacific University, major in Communications/Broadcasting. Ni Denise Pelayo Della, balasang da Mr. & Mrs. Flor Della ti Kahului, agdama nga agbasbasa idiay University of Washington iti Pre-Med double major in Environmental Health and Economics- kayatna ti agbalin a Pediatrician. Ni Susannah Kelly Evangelista, asawa ni Eddie Evangelista. Nangrugi a nagbasa iti kina-Nursing idi 2006 iti Maui Community College. Ni Kennedy Paz Golino, anak da Mr. & Mrs. Reynaldo Golino ti Kihei ken agdama nga agad-adal idiay St. Martin's University iti Washington, majoring in Business Administration; ni Roosevel Paz Golina, anakda Mr. & Mrs. Reynaldo Golino. Agbasa idiay Washington State University para kina-Arkitekto. Ni Matthew Parilla, anakda Mr. & MRs. Henry Parilla, agdama nga agbasbasa idiay California Polythechnic State University iti San Luis Obispo para iti kurso a Mechanical Engineering. Ni Cherry Lei- R. Pascual, balasang da Mr. & Mrs. Audi Pascual ti Wailuku, agdama nga agbasbasa idiay University of Hawaii-Manoa; ni Mary Rose Pigao, anakda Mr. & Mrs. Paul Pigao ti Kahului, adda sadiay Portland State University para iti Graphics Design; ni Christie Mae Soriano, anakda Mr. & Mrs. Arthur Soriano ti Kahului, agbasa idiay University of Hawaii- Manoa para iti kurso a Medical Technology; ni Marnelli Taasin, balasang da Mr. & Mrs. Nick Taasin ti Kihei ken agdama nga agbasbasa idiay Hawaii Pacific University para iti kina-Bachelor of Science degree- major iti Accounting ken Human Resource Management; ken ni Deanelle T. Symonds, balasang da Mr. & Mrs. Hubert Symonds ti Kahului. Naawatna ti special recognition scholarship idiay Massachusetts Institute of Technology [MIT].

Tapno makatulong iti panagur-or para iti scholarship funds, insayangkat ti USDIR ti umuna nga annual Scholarship Golf Tournament idiay Ellair Golf Course iti Kihei, sakbay ti scholar's dinner. Nagserbi ni Councilmember Joe Pontanilla kas Director of Tournament babaen iti panangbayabay da Arnel Alvarez ken Greg Peros, Co-Chairmen, ken dagiti Committee Members.

Dagiti opisial ti USDIR: Lou Sinfuego, Jr.- Presidente; Marisaa Ugale, Emi ken Domingo Cortez, Rudy Paa, Joe ken Tessie Segui, Fred Duldulao, Maggie Evangelista, Claro Romero, Roger Evangelista, Delfin Gujal, Amado Maculam, Fred Rancapollo. Ni dati a Maui Mayor James Apana ken Michele Yoshimura ti nagbalin nga Special Advisors.*

__________________________________________

Feb 22, 2008

Labor Women Dagitoy Iti Hawaii

Ni Rudy Ram. Rumbaoa


[Maudi iti Dua a Paset]


MANIPUD idi 1882, marambakan ti Labor Day kas legal holiday iti Mayo 1 iti kaaduan a pagilian ken iti umuna a Lunes iti bulan ti Setiembre iti Estados Unidos ken Canada. Kabayatan ti panakarambak daytoy naisangsangayan nga aldaw, maited ti pammigbig kadagiti tattao.

Iti U.S., narambakan ti umuna a Labor Day idi Martes, Setiembre 5, 1882 idiay New York City. Ket idi 1884, napili ti umuna a Lunes iti bulan ti Setiembre kas naisangsangayan, daytoy ti orihinal nga aldaw nga insingasing ti Central Labor Union a panakarambak ti "workingmen's holiday." Naiwaras daytoy a kapanunotan bayat ti panagdakkel ti bilang dagiti labor organizations. Ket idi ngarud 1885 Labor Day, rinambakan dagiti industrial centers daytoy a petsa ken kadagiti dadduma nga estado ti U.S. Idi tawen 1894, inadaptar ti 23 nga estado daytoy naisangsangayan nga aldaw ken naipasa iti Kongreso ti akta a mamagbalin daytoy nga aldaw kas legal a holiday karaman kadagiti sinakupan a daga ti U.S. kas iti District of Columbia..

Iti America, napataud ti Labor Day kas labor movement ken dedikasion iti pang-sosial ken pang-ekonomia a naaramidan dagiti American workers. Agtinawen a malagip ti kontribusion dagiti mangmangged kas simbolo ti kinapigsa, narang-ay ken ti panagkaykaysa ti nasion.

Segun iti Webster ti sao/balikas a "labor" [aramid] ket maipatarus kas "paggustoan ti panunot wenno pisikal nga aramid, nagruna iti tiempo ti rigat wenno kompulsario; ken ti aktibidad ti bagi tapno agpataud iti nasayaat ken serbisio iti ekonomia; ken dagiti agtartrabaho nga empleado iti maysa nga establisimiento." Para kadagiti babbai, ti sao/balikas a "labor" ket ad-adda a maipatarus iti personal a kayatna a sawen, iti reperensia ti kinatao ti nalawag nga aramid sapulenna ti birthing [panakaipasngay] a proseso. Dagiti lallaki asistirenda dagiti nagannak kadakuada iti tiempo ti "labor" wenno asino nga adda kabayatan ti panakayanak ti maysa a maladaga, ngem saan nga agpasngay [ti ina], maysa laeng nga imahinasion tapno marikna ti ut-ot ken rag-o kas ebidensia- buklenna amin dagitoy iti "life-giving phenomena."

Para iti Labor Day 2007 iti Hawaii, innem dagiti napili a babbai, maysa iti tunggal isla ti Hawaii ti nakarikna ti rigat manipud iti rag-o ti panangipasngay agingga iti magun-odan ti aramid, iti trabaho man ken iti uneg ti kuarto a pagpasngayan.

Manipud amianan agingga iti abagatan iti isla ti Hawaii, inyeg da Sonia Yago Topenio ti Kauai, Dr. Elizabeth Ignacio ti Oahu, Debbie Sagabaen Davis ti Molokai, Agnes Macadangdang Hayashi ti Maui, Leticia Castillo ti Lanai ken Margarita Leyson Hopkins ti Big Island of Hawaii ti espesial a serbisio iti komunidad: panangtimbeng kadagiti karit nga itden ti trabaho ken iti pagtaengan, panakidenna iti pamilia, dagiti annak, kabagian ken kas ina, asawa, kabsat, auntie, ading, manang, nana, apo, boss, kapatada wenno kumporme dita.

[Tuloyna...]

Iti LANAI
"Ibagam no ania ti kayatmo nga ipaaramid ta aramidek," dagitoy ti nabatad a balikas ni LETICIA SERAPION CASTILLO, nalatlatak ti awagna kadagiti gagayyem ken ti pamiliana kas "Letty." Iti isla ti Lanai, maysa a five-star resort nga addaan iti tiny plantation villages ken kaaduan a bilang ti residente ket Filipinos, nagbalinen a kaugalian ni Letty ti agboluntario nga agserbi para iti panagdur-as ti komunidad, tallo a dekadan ti napalabas. Iti agdama, ni Letty ti presidente ti Lanai Community Association, opisina nga iggemna manipud idi 1996; sangapulo a tawen sakbay dayta, nagserbi nga umuna kas sekretario. Para iti Filipino Centennial Activities, nagserbi daytoy kas komisioner ti Lanai iti State Filipino Centennial Commission manipud 2002 agingga iti 2006. Innem a tawen sakbay dayta, nagserbi kas Governor's Liaison. Manipud 2002 agingga iti agdama, nagserbi kas board member para iti seloective Service System. Sabali laeng ti iggemna nga Marriage License Agent, maysa a serbisio nga itden ti kasapulan kadagiti agplano nga agkallaysa a binangonna idi 1980.

Idi 1980s, karaman daytoy iti Lanai Advisory Committee of the Maui Planning Commission kas Chairperson manipud 1986-89 ken miembro manipud 1981-87. Bayat daytoy a tawen, nagbalin pay a presidente iti dua nga organisasion- ti Lanai Band Boosters, 1983-87 ken ti Filipino Catholic Club, 1984-88. Sabali laeng ti Steward of the Hawaii Government Employees Association [HGEA] manipud iti 1978-1983 ken Deputy Local Registrar, 1974-2002; Vice Chair of the School Advisory Council, manipud 1990-1998.

Nagtrabaho iti Lanai Community Hospital- nagbalinen a kangrunaan a paset ti panagbiagna ken kas panagserbina kadagiti umili ti Lanai. Manipud 1988 agingga iti panagretirona, nagserbi daytoy kas Human Resource Clerk, 1978-1988; Account Clerk III, 1966-1976; Billing and Collections, 1973- 1974; temporary assignment kas Business Manager.

Naawat ni Castillo ti Certificate in the Principles of Accounting manipud iti Kennedy Western University, California.

Ti panniriganna kadagiti Filipina iti lugar ti pagtrabahoan kunana: "Dakkel a katulongan dagiti babbai, karamanda a teddek iti panagtrabaho. Nagaget, napakumbaba...trabahuenda dagiti banag nga ammoda a pagsayaatan."

Nayasawa ni Leticia ken ni Loreto, plumber, ken retirado iti Lanai Company. Dua ti annakda- Lorna ken Lombert.

Iti MAUI
Kas Deputy Director of Finance for the County of Maui manipud idi 1999, inyeg ni AGNES MACADANGDANG HAYASHI ti kina-perspektibo ni Filipina iti lamisaan ti administrative. Iti iggemna a posision, maikatlon a mayoral administration ti iserbianna, isu ti maysa kadagiti kabayagan nga nagserbi iti gobierno. Isu ti panakarangtay ken koneksion ti gobierno iti lokal a komunidad. Ket gapu iti Japanese-Filipino marriage, nalawlawa ti kapanunotanna maipanggep iti kultura ken ethnic groups ket banag a daytoy ti nadardaras a panakaawatna dagiti kasapulanda. Kayatna a padapada mabenipisiaran ti amin nga it-itden a serbisio ti lokal a gobierno.

Nayanak ni Agnes iti Maui. Dimmakkel idiay Wailuku babaen iti panarabay ti tatangna, ni Pedro, maysa a 1946 Sakada ken ti ina daytoy, ni Remigia. Idi 2002, inawatna ti "Gintong Pamana: Outstanding Filipino Leadership Award" manipud iti Maui Filipino Chamber of Commerce.

Idi tawen 1983, nagturpos ni Agnes idiay Unibersidad ti Hawaii-Manoa iti kina-Bachelors Degree iti Business Adminstration with Distinction. Awan ti problema ti iseserrakna iti trabaho. Nagrekrut ti GTE Corporation [Verizon] iti intero a pagilian, 22 a nagturpos iti kolehio para iti 18 a bulan a financial executive maangement training program. Ni Agnes ti kakaisuna a UH graduate a naupaan para iti daytoy a programa, ket daytoy ti gapuna a napan nagtrabaho diay Connecticut, Honolulu ken California.

Kalpasan iti walo a tawen iti dayta a trabaho, nagdesision ni Agnes nga agsubli iti Maui, a kaduana ti asawana, Duane, ken ti maysa a tawen nga anakda, ni Wesley. Naipokus kenkuana ti pagtaengan ken pamilia. Iti di mabayag, naupaan nga agtrabaho iti Maui Land & Pineapple Company kas Director of Internal Audit, siam a tawen nga iggemna dayta a posision.

Iti panakayanak ti inaudi nga anakna idi 1999, adu ti nagbaliwan ti panagbiagna. Dinutokan ni dati a Mayor James Apana kas Executive Assistant to the Mayor. Kalpasan daytoy, naisaruno ti panakadutokna kas Deputy Director of Finance, nga agingga ita, iggemna pay laeng dayta a posision. Para ken ni Agnes, baro a karit daytoy iti panagserbina iti gobierno..

Ti umuna a responsibilidad a sinangona nga insigida ket ti panakaimaniher ti lima a programa iti Department of Finance, ken direkta nga akin-responsibilidad ti dua a kangrunaan a dibision. Babaen kenkuana, pinapintas ken pinasayaatna ti bond rating, daytoy ti gapuna a maysa ti Maui ti kangatoan iti estado. Direktiba nga isu ti project manager, ti panakabalasa ken re-organisasion ti County services, ti Division of Motor Vechicle and Licensing.

Nagboluntario ken nagserbi daytoy kas Vice-Chair and Parent Representative, School Community Council, King Kekaulike Complex, 2005 agingga iti agdama; miembro iti Pukalani School PTA, SCBM Council and Audit Committee, 1994- iti agdama; ken Miembro ti Kalama Intermediate School, 2002-2004.

"Adu ti naglasatan a rigat ken karit dagiti nagannako kas imigrante iti gangannaet a lugar- ti Hawaii- ken ti sakripisio, panaganus ken determinasionda, nalabananda amin dagitoy, nalasatanda amin dagitoy- ti "estoria ti Sakada" a kaaduan kadatayo a kaputotanda ti makaekspiriensa, nagbalin a nga inspirasion kadatayo," kuna ni Agnes.

Magustoan ni Agnes ti trabahona kas Deputy Director of Finance- adu dagiti karit ken pannubok, kunana. Gapu iti daytoy, dakkel nga opurtunidad ti panagserbi ken ti kontribusionna iti komunidad ken ti sibubukel a county of Maui. "Agyamanak iti Dios ta napataud daytoy nga opurtunidad a para kaniak. Narigat ngem adda gunguna. Mamatiak iti bision ni Mayor Charmaine Tavares ket agyamanak ta pinagtalinaednak iti county tapno agserbiak iti kabinetena. Kasta met a pagyamanak ti naited kaniak nga opurtunidad nga inserbiak da pasado Mayor James Apana ken Mayor Allan Arakawa.

Iti BIG ISLAND [HAWAII]
Kadagiti ka-Filipinoan iti estado ti Hawaii, nalatlatak ti nagan ni MARGARITA LEYSON HOPKINS kas "Dayday" ["die-die" ti panakaibalikasna], nagan a mayarngi iti Visayan pride ken liderato. Kinapudnona, nabotosan manen itay napan a bulan para iti maikadua a termino a panagserbina iti opisina ti Presidents of Congress of Visayan Organizations [COVO]. Nagserbi daytoy iti kaaduan a komunidad ti Filipinos iti Big Island ken iti estado ti Hawaii.

Iti Big Island, isu ti Economic Development Specialist for the County's Department of Research and Development, iggemna daytoy a posision manipud idi 1989. Idi tawen 2000, nagbalin a Director of Research and Development for the County. Karaman iti responsibilidadna ti mangimaniher ken aywanan ti amin nga empleado, contractors ken grantees iti departamento.

Manipud 1989 agingga iti agdama, agtultuloy ti panagisurona iti undergraduate courses iti economics ken ag-lecture iti College of Business and Economics iti Unibersidad ti Hawaii idiay Hilo. Gapu iti backgroundna iti benneg ti edukasion, naikkan ti gundaway a mangisuro iti foreign countries ken iti U.S. mainland.

Ni Dayday ti nagsurat ken co-author iti six papers international journals ken ti symposia, dua a kapitulo, uppat ti naipablaak nga artikulo a miscellaneous, ken uppat pay ti di naipablaak a technical reports.

Maysa nga American citizen, nayanak ni Dayday idiay Maasin, Filipinas. Sadiay a nangrugi a nagbasa, naturposna ti B.S. degree iti Accounting iti St. Joseph College idi 1971 ken ti M.S. degree iti Agricultural Economics manipud iti Xavier University idi 1975. Manipud 1976 agingga iti 1979, nagbasa iti Agricultural Economics & Fisheries iti Auburn University sakbay ngam immakar idiay Oregon State University [OSU] no sadino a nagbasa iti Agricultural Economics manipud 1985-88. Nakompletona amin a coursework para iti kina-Ph.D manipud OSU ngem immakar ti pamiliana iti Hawaii sakbay a malpasna koma ti panagsukisok [research].

Maysa a propesor iti University of Hawaii-Hilo ti naasawa ni Dayday. Tallo ti annakda, ken lima dagiti appokona. Kas maysa a nagannak, naited ken ni Dayday ti liderato ken panagboluntario iti grupo a mangsuporta ti edukasion ken panagdur-as dagiti ubbing, karaman ditoyen ti panagbalinna a referee ken coach iti American Youth Soccer Organization [AYSO] iti innem a tawen.

Iti biangna kas maysa a Filipina iti lugar ti trabaho kunana: "Nupay umad-adu ti bilang dagiti babbai iti labor force, dakkel pay laeng ti pagdiperensiaan iti nagbaetan dagiti lallaki ken babbai no maipanggep iti ekspektasion iti negosio ti pagsasaritaan. Para kaniak, ti tradision ti propesional a babai a Filipina ket tengngel dagiti lallaki, ngem agtrabahoak iti nalablabes ngem iti naited kaniak a trabaho tapno adda panagtalek kaniak dagiti tattao nga iserbiak. Paneknekak a kabaelak ti naipakumit kaniak a trabaho."

Innayonna, "Nupay agtrabaho dagiti babbai, rumbeng pay laeng nga aywananna ti trabaho iti pagtaengan ken panaripato dagiti annakna. Dayta nga ekspektasion ket saan laeng a bukod a pagtaktakderan dagiti lallaki, ngem pati dagiti babbai. Tapno mapaneknekan nga uray agtrabaho dagitoy a babbai ken saan a maapektaran ti napintas nga annayas ti pamilia, kaaduan kadagiti babbai ti agbalin a "superwoman syndrome" tapno maiserbianda iti agpadpada a pagtaengan ken iti trabaho.

Naaramid iti biyolohika dagiti babbai kas kangrunaan a mangtaripato kadagiti annak. Ket kabayatan iti dayta, masapul met a makipartisipar wenno makipaset dagiti babbai iti amin nga aspeto [wenno levels] ti trabaho," inggibus ni Hopkins.*

____________________________________________________________________

Feb 20, 2008

Labor Women Dagitoy Iti Hawaii

Ni Rudy Ram. Rumbaoa

__________________________

[Umuna iti Dua a Paset]

MANIPUD idi 1882, marambakan ti Labor Day kas legal holiday iti Mayo 1 iti kaaduan a pagilian ken iti umuna a Lunes iti bulan ti Setiembre iti Estados Unidos ken Canada. Kabayatan ti panakarambak daytoy naisangsangayan nga aldaw, maited ti pammigbig kadagiti tattao.

Iti U.S., narambakan ti umuna a Labor Day idi Martes, Setiembre 5, 1882 idiay New York City. Ket idi 1884, napili ti umuna a Lunes iti bulan ti Setiembre kas naisangsangayan, daytoy ti orihinal nga aldaw nga insingasing ti Central Labor Union a panakarambak ti "workingmen's holiday." Naiwaras daytoy a kapanunotan bayat ti panagdakkel ti bilang dagiti labor organizations. Ket idi ngarud 1885 Labor Day, rinambakan dagiti industrial centers daytoy a petsa ken kadagiti dadduma nga estado ti U.S. Idi tawen 1894, inadaptar ti 23 nga estado daytoy naisangsangayan nga aldaw ken naipasa iti Kongreso ti akta a mamagbalin daytoy nga aldaw kas legal a holiday karaman kadagiti sinakupan a daga ti U.S. kas iti District of Columbia..

Iti America, napataud ti Labor Day kas labor movement ken dedikasion iti pang-sosial ken pang-ekonomia a naaramidan dagiti American workers. Agtinawen a malagip ti kontribusion dagiti mangmangged kas simbolo ti kinapigsa, narang-ay ken ti panagkaykaysa ti nasion.

[Segun iti Webster ti sao/balikas a "labor" [aramid] ket maipatarus kas "paggustoan ti panunot wenno pisikal nga aramid, nagruna iti tiempo ti rigat wenno kompulsario; ken ti aktibidad ti bagi tapno agpataud iti nasayaat ken serbisio iti ekonomia; ken dagiti agtartrabaho nga empleado iti maysa nga establisimiento." Para kadagiti babbai, ti sao/balikas a "labor" ket ad-adda a maipatarus iti personal a kayatna a sawen, iti reperensia ti kinatao ti nalawag nga aramid sapulenna ti birthing [panakaipasngay] a proseso. Dagiti lallaki asistirenda dagiti nagannak kadakuada iti tiempo ti "labor" wenno asino nga adda kabayatan ti panakayanak ti maysa a maladaga, ngem saan nga agpasngay [ti ina], maysa laeng nga imahinasion tapno marikna ti ut-ot ken rag-o kas ebidensia- buklenna amin dagitoy iti "life-giving phenomena."]

Para iti Labor Day 2007 iti Hawaii, innem dagiti napili a babbai, maysa iti tunggal isla ti Hawaii ti nakarikna ti rigat manipud panangipasngay ti maladaga agingga a magun-odan ti balligi a nagappuan, iti trabaho man ken iti uneg ti kuarto a pagpasngayan.

Manipud amianan agingga iti abagatan iti isla ti Hawaii, inyeg da Sonia Yago Topenio ti Kauai, Dr. Elizabeth Ignacio ti Oahu, Debbie Sagabaen Davis ti Molokai, Agnes Macadangdang Hayashi ti Maui, Leticia Castillo ti Lanai ken Margarita Leyson Hopkins ti Big Island of Hawaii ti espesial a serbisio iti komunidad: panangtimbeng kadagiti karit nga itden ti trabaho ken iti pagtaengan, panakidenna iti pamilia, dagiti annak, kabagian ken kas ina, asawa, kabsat, auntie, ading, manang, nana, apo, boss, kapatada wenno kumporme dita.

Iti KAUAI
Iti isla a lugarna, ni SONIA YAGO TOPENIO ti mabigbig a powerhouse. Iti trabaho, isu ti Bise Presidente ken Business Banking Manager for the Kaua'i Business Banking Center of the Bank of Hawaii, no sadino a ditoy a naital-o ti posisionna itay nabiit kas Branch Manager manipud kadagiti amin nga innem a sanga ti bangko iti intero nga isla ti Hawaii. Nagun-odna daytoy a panakaital-o manipud nagtrabaho iti bangko idi 1981. Nangrugi kas Management Trainee. Aktibo iti civic ken serbisio pang-komunidad. Naawatna ti Outstanding Leadership Award for Women in Business idi 2004 nga inesponsoran ti Kaua'i Chamber of Commerce and the Women in Business Roundtable. Miembro pay daytoy iti County's Workforce Investment Board and Board of Review, Citizen's Action Committee member for the Lihue Urban Core Design, Den Leader for the Boy Scouts of America, ken ti agtultuloy a panakikamengna iti Kapa'a Rotary manipud idi 1998.

Iti komunidad ti Filipinos, nabotosan itay nabiit kas Presidente ti Kaua'i Filipino Chamber of Commerce babaen iti panangiyendorso, bendision ken pannarabay da Oscar ken Annabel Portugal, ti in-ingungoten ken nabayagen a lideres iti komunidad ti Filipinos iti Garden of Isle. Iti panagimatonna iti daytoy nga opisina, naipakumit kenkuana ti agtultuloy a panagballigi ti chapter unit a nakagun-odan iti napintas ken nangato a reputasion babaen ti Filipino Chamber of Commerce of Hawaii's statewide umbrella. Sakbay a nailayon daytoy kas presidente, nagserbi pay daytoy kas tesorero ken bise presidente, karaman ditoyen ti kina-tresorera iti Kaua'i Filipino Centennial Celebration Committee.

Iti agdama, kaay-ayona ti akemna iti banking world tapno agserbi, ken kitaenna ti pagsayaatan ti nainlubongan nga ekonomia.

Edukado idiay Filipinas ken Hawaii. Nagturpos iti Kauai High School idi 1976. Uppat a tawen kalpasanna, nakompletona ti kina-Bachelor in Business Administration-Management idiay Unibersidad ti Hawaii-Manoa.

Nayasawa ni Sonia ken ni Eddie, maysa a banquet manager iti Princeville Resort. Dua ti annakda a lallaki- ni Robert ken Tyler.

Iti OAHU
Nayanak idiay Filipinas ni DR. ELIZABETH IGNACIO. Napan ken dimmakkel iti Honolulu, idiay Oahu. Idi 1989, nagbalin daytoy kas Hawaii's Junior Miss, a nakaawatanna ti pammadayaw iti academic distinction iti national competition. Iti isu met la a tawen, nainaganan daytoy kas America's Young Woman of the Year for Scholastic Achievement, ken napan iti National Merit Scholar iti sumaruno nga uppat a tawen.

Kalpasan a nagturpos iti Iolani School, nagbasa idiay Georgetown University iti Washington D.C., ditoy a naawatna ti B.S. degree iti Biology idi 1993. Iti panagtultuloyna iti Georgetown University Medical School, nagun-odna ti kina-Doctor of Medicine [MD] idi 1997. Ditoy nga inlasinna ti bagina kas umuna a babai iti 15 a tawen a naawat iti residency program, nagbalin a maikatlo a kakaisuna a babai a naawat iti 50 a tawen a pakasaritaan. Iti itutulongna iti laboratorio ti National Institute of Health kabayatan iti panagyanna sadiay, iti panagsukisokna kas paset ti trabaho, naawatna ti pammadayaw manipud iti Washington D.C. Orthopedic Society.

Kalpasan a nag-residency, inyuswat ni Dr. Ignacio ti fellowship training iti sports, medicine ken arthroscopic and reconstructive surgery iti Southern California Center for Sports Medicine iti Long Beach. Kas kaunaan a babai iti pakasaritaan ti fellowship, naimbitaran daytoy nga agpraktis, ditoy a nagbalin a kaunaan a babai a faculty member ti fellowship. Responsibilidadna kas faculty ti ag-lektiur ken ag-training kadagiti sabali nga orthopedic surgeons manipud iti napabaro a teknik ti orthoscopic and reconstructive surgery.

Kas maysa a sertipikado babaen ti American Board of Orthopedic Surgeons in general orthopedics, nabigbig pay daytoy iti special training in sports medicine and arthroscopic annd reconstructive surgery. Ti kinapudnona, adda innem a porsiento dagiti babbai iti amin a bilang nga adda iti benneg ti orthorscopic surgeon.

Iti komento ni Ignacio iti personal a kapadasanna kas maysa a Filipina iti lugar ti trabaho, annugotenna nga agduduma ti kolor dagiti babbai a nangiduron kadakuada nga agballigi nupay adda social disparities. Kunana, "Masapul ti nagaget a panagtrabaho ken agbalin a nasayaat, ekspektarek dagiti reponsibilidad nga agbalin a pagulidanan kadagiti sabsabali a babbai, iti anakko...ti nasaysayaat tapno makita kas ekual wenno pumada kadagiti dadduma."

Iti MOLOKAI
Nagnaed ni DEBBIE LYNN SAGABAEN DAVIS iti isla ti Maui a nakayanakanna agingga idi nagtawen iti 12. Dimmakkel iti Puunene, Kahului. Nakita ni Debbie no kasano ti kinarigat ti panagtrabaho da Lolo ken Lolana tapno laeng adda pagbiagda. Daytoy nga obserbasion ti nangitunda kenkuana "a dinanto lak-amen dayta a kinarigat ti panagtrabaho."

Kas maysa kadagiti 1946 Sakada ni Lolongna, nagtrabaho daytoy iti irigasion iti kaunasan ti Puunene. No dadduma, mapanna tulongan ni Apongna nga agpasayak. Nakaurnong ti pamiliana ti igatangda iti balay iti Kahului ket siniguradoda a mabayadanda amin daytoy nga awan ti problema [ta kadagidi a tiempo, awan pay credit cards]. Apaman a nakaallatiwda iti baro a pagtaenganda, nagtultuloy latta ti panagtrabaho ni Lolona iti kaunasan.

Kalpasan a nagturpos iti Molokai High School, napan idiay Rexburg, Idaho, iti dua a tawen, ken dita metten a nasapulanna ti nagbalin nga asawana.

Idi makita ni Debbie a dumakkelen dagiti annakna, napan nagtrabaho iti Molokai General Hospital kas ward clerk, kalpasan nagbalin a Senior Biller iti business office. Iti uppat a tawen a pangtrabahona sadiay, nakikameng iti United Public Workers Union [UPW] ket nailayon daytoy kas Chief Steward isu ti nangibagi ti pribado a sektor iti agarup sangapulo a tawen. Ket kas miembro, idanonna dagiti isyu wenno problema ti unyon tapno isapulan dagiti opisiales ti unyon ti sulusion. Iti laksid ti kaaddana iti unyon, dina met latta baybay-an dagiti aginaldaw a responsibilidadna iti business office. Napan dagiti opisiales ti unyon idiay Honolulu tapno masursuroda no kasano a tulongan, awaten ken agbalin a nasaysayaat a leaders ken stewards. Gapu iti training sessions para iti napintas a panangidaulo, ar-aramatenna daytoy a teknik iti agdama.

Iti pribado a panagbiagna, imbaon ti ina daytoy nga agsursuro iti Filipino cultural dances, ket nagbalin a miembro iti Filipiniana Dance Troupe iti babaen ni Aurelia Viernes. Malagipna ti kinarigat iti panagtrabahona tapno laeng mataginayon ti kultura ni Filipino. Masintirna a kaaduan kadagiti agtutubo iti 1970s-80s ti di mangbigbig ti kinasinoda kas maysa a Filipino, ngem aprisiarenna ti positibo nga impluensia dagiti Filipinos iti agdama ta adu kadakuada ti nagballigi a nakagun-od iti arapaapda- iti gobierno ken iti komunidad.

Itangsit ni Debbie ti kina-Filipinona. Iti agdama, agserbi ni Debbie kas Molokai's representative on the Board of Governors for the United Filipino Council of Hawaii [UPCH]. Magustoanna ti agriing a masapa iti binigat tapno mapan agtrabaho kas Billing Manager para iti Molokai Ohana Health Care, Inc.

Kunana: "Awan trabaho a mailemmeng, agaramidka iti naimbag a pagulidanan tapno agbalin daytoy a pakalaglagipan ken tarigagay a tuladen ti sabali."*

[Adda Tuloyna...]
_______________

Feb 15, 2008

Filipina daytoy Biotech Awardee

Ni Rudy Ram. Rumbaoa



NAGGIBUSEN dagiti adu a panakapaay iti estoria ni ROSALIE ELLASUS. Ketdi, nagun-od daytoy saan a kadawyan a Filipina a mannalon iti nakidangadang kadagiti adu a karit ken pannubok- ita, inawatna ti kaunaan a pakalaglagipan: "Ti Dean Kleckner Trade & Technology Advancement Award."

Iti tayagna, makuna a bassit a babai ni Rosalie, ngem isu ti maysa kadagiti kadakkelan, maipanakkel ken addaan iti kina-inobasion no panagtalon ti pagsasaritaan iti developing world wenno iti pagilian a mangrugi pay laeng nga agdur-as.

Ti nakakaskasdaaw, saan a dimmakkel ni Rosalie iti pamilia dagiti agtaltalon. Itay 1995, saan daytoy a karaman iti benneg ti agrikultura kas propesionna. Kinapudnona, nabiit pay daytoy a nabalo, ket daytoy ti gapuna a nayawat kenkuana ti amin a responsibilidad ti agtagibalay kas ama ken ina kadagiti nga annakna tapno masuportaranna ida kas maysa a "single mother."

Innalana ti kakaisuna nga urnongna iti bangko ket ingatangna iti bassit a talon/daga agarup 1.3 hectares [3.2 acres].

Nagtrabaho ni Rosalie iti international kas domestic aide ken marketing specialist ta naan-anay ti ammona maipanggep iti panagtalong, ngem ti kinapudnona, dina ammo nga ipataray ti mismo a talon. Nangupa iti kaanakanna tapno daytoy ti mangkita ti panakaipataray ken operasion ti talon. Makadismaya kenkuana ti nagbalin a resulta. Nautob ni Rosalie a no agtultuloy daytoy, namnamaenna a dina mapagadal ken saan a makapag-kolehio dagiti annakna.

Dagiti nagbalin a kalaban: "peste ken dakes a root." In-inut a perdienda ti kamaisanna. Inako ni Rosalie, saan a magustuan ken kayat dagiti negosiante nga aggatang iti mulana a mais. Ti kangrunaan a problema ket ti panakaabot dagiti tagimula a mais. In-inut a maabotan ti mula ket ditoy a maaramid ti dalan a sumrekan dagiti anay, sakit iti mula ken fungi a manglamut ken mangpisti kadagiti mula.

Desperada ni Rosalie tapno isapulanna ti sulusion ti problema. Nagatendar ngarud ni Rosalie iti pest-management school ket nakasursuro daytoy maipanggep iti biotechnology. Kas paset ti panagadal, naipalapalda iti maysa a pagtatalonan ti Biotechnology tapno ditoy a pagadalanda no kasano ti panakaimaniher daytoy. Nakumbinsi ngarud ni Rosalie a ti GM crop ket isu ti sungbat kadagiti karit ken pannubok a sangsangnguen ti pagtatalonna.

"Idi makitak ti kamaisan iti pagtatalonan ti Biotechnology," inako ni Rosalie, "Sinaludsodko iti bagik, apay a naidumduma ti langa ken buya daytoy no maidasig kadagiti mais nga immulak? Naintrigaak no apay a kasta unay ti dalus dagiti bukel ken ti langa ti sibubukel a mais."

Gapu iti daytoy, nakasursuro iti baro a wagas ket nagsubli iti ili a naggapuanna tapno agbalin a kaunaan iti rehiyon a mangsubok ti Bt corn. Nupay nabayagen a komersialen a produkto iti merkado publiko ti GM crops, nangruna iti Estados Unidos, adu latta dagiti sumuppiat iti daytoy a wagas ti panagmula- iti lokal. Ket uray sadino ti papanam, adda latta dagiti tattao a sumuppiat ken di mangayat iti panagbalbaliw iti wagas ti panagmula. Iti bukod a lugar ni Rosalie, adda sumagmamano a tattao dina kainnawatan iti daytoy a wagas.

Ngem narigat ti maki-argumento iti resulta. Timmaud ti apal manipud kadagiti karrubana gapu iti nasayaat a bunga ti panagmulana iti mais. Ket daytoy ti nanipudan ti panagramram a kasla apuy nga adda ilemlemmeng ni Rosalie a kinasirib- ken ti biotechnology ti mabalin a makatulong kadagiti sabsabali pay a mannalon a Filipino. Ket gapu iti dayta a wagas, adu ti nangtulad iti estilo ti panagmulana.

Nagtultuloy ngarud nga inarakup ni Rosalie ti biotechnology, nagtultuloy met a nagsurusuro kadagiti kabaroanan a wagas ken pinanamnamana dagiti dadduma nga agballigida no padasenda ti naadalna maipanggep iti panagmula. Itay napan a tawen, minulaanna amin a talonna iti estilo ti biotech. "Nalawag a makitam ti resulta ti naimula ket makuna a naisangsangayan unay daytoy," kuna ni Rosalie. "Pudno a nakumbinsirak a mapadur-as dagiti marginal farmer no adaptarenda ti biotechnology.

Iti agdama, naikabassit ni Rosalie iti trabaho ti panagarado ken nasuktan ti labor-intensive hand-weeding iti saan unay a nangato nga aplikasion para iti herbicides. Ket gapu iti daytoy, napadakkelna ti taltalonenna iti 6 hectares [15 acres].

Kangrunaan, natulongan ti biotechnology dagiti arapaapna: "Uray pay maysaak laeng a single parent, naibaonko dagiti annakko iti kolehio- iti napintas nga unibersidad babaen iti nayon a mapastrekko iti panagmula," maragsakan a nangibaga. "Kasla adda milagro a nangbalbaliw ti biagko."

Maysa nga ekstra nga ordinario a tao ni Rosalie- ngem iti adu a wagas ken pagwadan pay daytoy. Kas kadagiti mannalon iti intero a lubong ni Rosalie, nangpadas iti bassit a banag iti biag manipud iti bassit a talon ket sinarangetna dagiti kangrunaan a kabusor dagiti mula a kas iti kiteb, dakes a root, ken naalas a paniempo.

Iggem ti biotechnology ti kina-potensial tapno tumulong iti tunggal maysa kadakuada. No natulonganna ti maysa a balo iti Filipinas ken naibaonna dagiti annakna nga agbasa iti kolehio, maaramid met dagiti sabsabali tapno mataraonanda ti bukodda a pamilia ken ti komunidad.

Inawat ni Rosalie ti kaunaan a Kleckner Award kas pammigbig iti "naamnut a liderato, bision ken panakaresolba iti panagabanse ti kalintegan dagiti amin mannalon tapno pilienda ti teknolohiya ken ramit a mangpadur-as ti kalidad, kantidad ken ti nakasagana a produkto ti agrikultura iti intero a lubong."

"Iti bukod a pagilian. adu dagiti mannalon ti mangibaba kadagit uloda gapu ta saan nga ammo nga ipanakkel ti okupasionda," kuna ni Rosalie Ellasus, maysa a lider dagiti mannalon a Filipino. "Kayatko a makita ti panagraniag ti masakbayanda." *
________________________________

Feb 10, 2008

Dr. Lyla Bonnie Berg: "Transformational Leader"

Ni Rudy Ram. Rumbaoa



UNIVERSITY OF HAWAI'I, Hawaii- Tunggal tawen, agpili ti University of Hawaii College of Education iti agbalin a pakaipaayan ti "Transformational Leadership Award," maited a pammadayaw ken pammigbig iti asino man iti komunidad a ti panagbiag ken trabaho daytoy ket ti mangital-o iti epektibo a panagbalbaliw para iti naim-imbag a kasasaad iti kagimongan. Iti tawen 2007, naiyawat ken ni Dr. Lyla Bonnie Berg ti nasao a pammadayaw. Maysa ni Berg nga State Representative ken kasubsublina pay laeng manipud iti agtallo a lawas a Goodwill Visit idiay South Africa kalpasan ti sumagmamano a lawasna iti pagilian a Tsina iti maysa a professional development workshop and seminars a naangay para iti public school administrators and teachers.

Kas maysa a mangirupir ken mangibabaet iti kinapateg ti edukasion, impaganetnetna ti kadagsen ti responsibiidad dagiti nababaknang ken nabibileg a nasion kas iti Estados Unidos tapno sindadaan dagitoy a tumulong kadagiti awanan wenno daksanggasat ken marigrigat a tattao iti ania man a saad ken sirkumtansia ti panagbiag a kas iti napaneknekanna iti panagbisita idiay South Africa. Para ken ni Berg, maipakumit ti kinalider babaen iti bileg a maikawes kenkuana tapno tumulong iti proseso ti transpormasion, iti ania man a saad- indibidual man wenno ti sibubukel a sosiodad wenno kagimongan.

Iti bukodna a balikas kunana: "Iti short-term, maited nga insigida ti tulong iti klase ti materyal a banag a salaknib ti biag kas iti taraon ken paglinongan. Ti long-term ket adda naun-uneg a kaipapanan ti panagtulongmo ken maibasar daytoy iti mismo a bagi ken panagdur-as ti panunot ken ti espiritu, edukasion, pannuporta ti komunidad tapno agkaykaysa iti panakaital-o ti pagsayaatan ti amin. Ti kinasirib ti mangted ti bision para iti transpormasion. Ti pigsa kas iti bision ket basar iti naun-uneg a panakaawat, pammati ti panagbalbaliw, ken tured a mangidaulo kadagiti sabsabali a mangsaranget iti karit tapno naannayas ti panaggunay ti proseso, mai-pokus ti kalikaguman a tun-oyen. Kinapudnona, kasapulan ti transpormasion ti kangatuan ken kangrunaan kadagiti amin a sagut ken talento manipud iti tao, ta daytoy ti pakasubokan ti human will."

Sadino ti pakasapulan iti kastoy a lider ken kasano iti inda panagdur-as?
-iti biang ni Dr. Berg, adda posibilidad a naalana daytoy a kinasirib iti panakiasawa ti German-Dutch nga amana iti tubo ti Iloilo a Bisayana nga inana.

Idi 1969, nagturpos ni Dr. Berg iti Punahou School idiay Honolulu. Ket idi 1972, nagun-odna ti Dekanats Prufing manipud iti Unibersidad ti Salzburg, Austria. Tawen 1974, naawatna ti B.A. in Linguistic idiay Aleman ken Inglatera manipud iti Unibersidad ti Washington D.C., ken makapagsao pay daytoy iti pransia. Idi 1975, nagun-odna ti Masters of Education in educational administration and supervision manipud iti American University idiay Washington D.C.

Idi tawen 1979, iti Unibersidad ti Hawaii- Manoa, nagun-odna ti Masters of Education degree iti kurikulum ken panagisuro. Tawen 1981, nakompletona ti Educational Officer Certification for the Hawaii State Department of Education. Tawen 1994, naawatna ti kina-Ph.D. in Education manipud iti Union Institute idiay Cincinnati, OH. Idi 2006, nagturpos iti JFK School of Government iti Harvard University, Cambridge, MA ken Flemming Fellow iti Center for Policy Alternative Leadership Institute iti Washington D.C.

Iti agdama, maysa a legislature ni Dr. Berg, ken kas State Representative para iti 18th District manipud nailayon idi Nobiembre 2004. Agserserbi kas Assistant Majority Floor Leader kasta metten a kas Vice-Chair iti House Education Committee.

Kasta pay nga adda isuna iti Policy Committee ken miembro daytoy iti House Committees on Higher Education; Hawaiian Affairs; Water, Land & Ocean Resources; ken Energy & Envornmental Protection.

Iti nasurok a kinse a tawen a panagserbi ni Dr. Berg iti State of Hawaii Department of Education kas classroom teacher, student activities coordinator, vice-principal and middle-school principal sakbay a nagbalin nga instructor iti pre-service teachers iti Department of Curriculum & Instruction of the College of Education iti Unibersidad ti Hawaii, Manoa. Karaman pay ditoy, isu ti Hawaii State Coordinator para iti Center for Civic Education ken nangbangon ken dati a CEO ti Kids Voting Hawaii, maysa a non-profit grassroot organization a maidedikar iti sibiko nga edukasion dagiti agtutubo.

Iti nagbaetan ti tawen 1980 ken 1985, nagserbi Dr. Berg iti Molokai kadagiti sumaganad a posision: Trainer and Evaluator for the Ho'ona'auao Adult Learning Program with Alu Like, Inc., Director of Chapter 1 Program and Vice Principal iti Molokai High ken iti Intermediate School.

Iti agdama, ni Dr. Berg ti moderator ti maysa a talk show "211" nga esponsoran ti Aloha United Way ken maipabuya iti telebsion ti inaldaw iti OC-16. Sungbatan ti nasao a programa ti pakaseknan ti isyu iti komunidad babaen iti panakailawlawag ti topiko kas iti domestic violence, sexual abuse, teen pregnancy, ekspiriensa it uneg ti pagbaludan ken dagiti nagduduma a gangs.

Sabali laeng ti pagparangan ni "Miss Lyla" iti aglinawas a Department of Education Teleschool program, "Voices and Wings, a maipabuya iti KHET Public Television, Channel 10 ken maire-brodkas iti Olelo Channel 56. Ti "Voices and Wings" ket maysa nga inter-aktibo a programa a para kadagiti estudiante, tumulong daytoy a mangpadur-as ti konsepto ken aksion iti panakipagili iti intero a komunidad. Karaman ditoy a makipaset dagiti mangisursuro ken estudiante no ania ti pangyarigan dagiti agbuybuya iti nasiken a situasion, demokratiko a proseso, ken iti sibiko a partisipasion. Ni met laeng Dr. Berg ti State Coordinator para iti "We the People" Programs of the Center for Civic Education manipud idi tawen 2001, gagem daytoy a mangpadur-as ti civic society babaen iti preparasion ken edukasion dagiti agtutubo.

Ni Dr. Berg ti akin-kukua ti Lyla Berg & Associates, maysa a kompania a mangipapaay iti konsultasion no kasano a mapadur-as ti kinalider, epektibo a komunikasion, interpersonal relasionships ken customer service.

Kannayon iti naipaima kenkuana a responsibilidad iti State Representative: Facilitator for the Hawaii delegation to the Congressional Conference on Civic Education, nairubuat daytoy idi 2003 ket agtultuloy agingga ita, idiay Washington D.C., Legislator in Residence Program, University of Hawaii, Manoa idi 2005, ken Invitee-International meeting nga inrubuat ti International Parliamentarian Union ang the High Commissioner of Human Rights of the United Nations idiay Geneva, Switzerland, July 2005; Women's Policy Studies Institute, Washington D.C., May 2005; Fellow, Flemming Leadership Institute, Center for Policy Alternatives, Washingto D.C., 2006; Delegate, Early Childhood Education System Symposium nga inesponsoran ti National Conference of Legislatures, Dever, June 2006; Delegate Educational Leadership Colloquium nga esponsoran ti Education Commssion of the United States, Minneapolis, July 2006.

Aktibo iti partisipasionna iti komunidad kas miembro ti Rotary Club of Honolulu, kas director of the Civic Forum on Public Schools, ken contributing member iti Phi Delta Kappa, Delta Kappa Gamma women's educational sorority, ti Hawaii Association for Arts 1 Education, ken ti Hawaii Opera Theater. Nagserbi pay kas presidente ti Hawaii Association of Secondary School Principals bayat iti kaaddana ti Departamento ti Edukasion...

Adda artikulo ni Dr. Berg a maipabpablaak iti Honolulu Star Bulletin ken Honolulu Advertisement. Sabali laeng ti kontribusionna nga artikulo iti agbinulan a The Voice of Kapolei ken ti Filipino-American Courier. Idi tawen 2005, naawatna ti pammadayaw iti Liberty Bella Award manipud iti Hawaii Bar Association. Pammadayaw a maited iti saan a nagadal iti kina-abogasia ngem addaan iti dedikasion nga agserbi iti komunidad ken panangipakita ti civic spirit. Idi 2006, napadayawan kas miembro ti Alpha Delta Kappa Educational Women's sorority.

Iti sinapataanna a mangisuro iti agnanayon, pinagtipon ni Dr. Lyla Berg ti eksperinsana iti edukasion iti aspeto ti nagduduma a benneg ti interrelated activities nga iserbina kadagiti umili.

Kas maysa a mangisursuro kunana: "Art of humane and effective leadership that manifests lasting transformational."*
____________________________________________________________________________________________

Jan 24, 2008

Vernon Patao, Filipino Olympian ti Maui

ni Rudy Ram. Rumbaoa



MAIBILANG a national duty ti panangsanay kadagiti atleta iti sumagmamano a nasion. Iti paggiddiatanna, in-inut nga aramiden dagiti Amerikano kas family goal wenno tradision, ken awanan pay ekspiriensa iti nailian a panakaidaydayaw agingga a magun-odda ti maysa a naimballigian a pakasaritaan.

Ngem maisupiat iti daytoy a backdrop, adda nagpaiduma a ragsak a marikna iti gapuna, adda timmaud nga Olympian manipud iti Maui- maysa a local born, nasanay iti isla ken maysa laeng a produkto iti public school system. Isu daytoy awan sabali no di ni VERNON PATAO. Immaldit ni Vernon ti maysa a pakasaritaan dagiti Filipinos iti olimpiada. Saan laeng a naminsan, no di ket namindua a nangabak: idi tawen 1992 ken naulitan idi 1996, iti nakisalipanna a weightlifting. Idi 1992, kas miembro ti US Olympic Team idiay Barcelona, Spain, naisaad kenkuana ti maika-sangapulo a puesto iti lubong para iti 148-pound class. Ket idi tawen 1996, napili manen ni Vernon a miembro ti Olympic Team ti Estados Unidos ken napan iti The Games idiay Atlanta a nangabakanna iti maika-sangapulo ket pito a puesto iti world ranking para iti 141-pound class.

Nayanak ni Vernon idi Pebrero 13, 1970. Kas maysa nga agtutubo, naited kenkuana dagiti gundaway a maaddaan iti sumagmamano nga athletes training iti maysa a garahe iti asideg ti pagtaenganda. No kuan, mapan agbuya, kaaduanna, siripenna babaen iti maysa a tawa, ta managbabain ken dina kayat a masinga ti buybuyaenna. Idi maalana a komportable daytoy iti ar-aramidenna, nagaramid ti gundaway tapno lumsot iti dayta a tawa a sumrek iti uneg ti garahe. Ket iti maysa nga aldaw, inawatna ti imbitasion nga indiaya ti naimbag a tao nga akin kukua ti balay.

Ket manipud idin, konektadon ti nagbaetan da Vernon ken Dr. Yogi. Nagsinningedda nga agpagayam- addaan kaipapanan agingga a nagtennag a nagbalin a coachna. No sibibiag pay laeng ni Dr. Yogi ita, nalabit, agsanay ni Vernon a kaduana ti doktor tapno ibingayna dagiti arapaapna para iti masakbayan ken isublina met laeng iti komunidad dayta a magun-odna a balligi kadagiti tattao a nangaywan ken nangsuporta kenkuana. Inyebkas ni Patao a maysa a wagas ti panagyaman ti mangipaay iti serbisio iti nagbalin nga inspirasion ken bannuarna.

Idi ubing pay daytoy, rinugiannan ti weight lifting ken sinerrekna dagiti kompetision. Manipud rinugianna ti nagsanay ken nakisalip, isu ti kangrunaan kadakuada iti edadna wenno iti weight class iti tunggal salip. Nangrugi ti arapaapna a makisalip iti olimpiada idi tawen 1980, agtawen iti sangapulo. Ngem nairana iti dayta a tawen a binoykot ti Estados Unidos ti Summer Games, kuna ni Vernon, maysa a fourth grader idin, "nalamiis ti makisalisal." Nakiinnangaw pay a bassit daytoy- a makisalip para iti basketball ket sapulenna ti ay-ayam a maipaay para kinatayagna. Ngem limmasag ti weightlifting kenkuana.

Kuna ni Dr. Peter George, maysa a weightlifting coach iti tawen 1980 team, ken namintlo nga Olympic medalist iti weightlifting, ken ni Vernon Patao, "Nasayaat a tao, nalaing a mangibagi para iti Estados Unidos...Saanna nga ekspektaren a makagun-od iti medalia, ngem panagkunak, makaaramid iti naimbag. Umay latta isuna no kasapulanmi." Idi 1996, nagpraktis ni Dr. George kas orthodontist idiay Honolulu.

Tawen 1988 idi nagturpos ni Pataol iti Maui High School. Kas maysa a mabigbig a golfer, isu pay ti nangidaulo iti pageskuelaanna tapno mangabak iti golf para iti umuna a puesto iti state High School Golf Championship. Iti dayta met la a tawen, nagenrol iti Unibersidad ti Hawaii-Manoa ken nagturpos idi 1992. Iti dayta met a la a tawen 1992, iti edadna a 22, napan idiay Kahului, Maui, agingga idiay Barcelona, Spain, a kaduana ti US Olympic Team. Dita a nagun-odna ti 10th place iti 141-pound wenno 67.5 kg. class.

Sakbay ti panagballigina iti Olympic, adda isuna iti nailian a ranggo kas namitlo daras a US champion idi 1992, 1994 ken 1995. Nagbalin pay a namimpat daras nga Olympic Festival participant, a nangabakanna iti maysa a balitok, maysa a pirak ken dua a bronse a medalia. Idi 1990, isu ti nagbalin a National Junior Champion ken ti Golden West OPen Champion.

Kasakbayan ti 1992 Olympics, nagsubli ni Vernon iti Olympic Training Center idiay Colorado Springs, ti nagbalin a pagtaenganna iti sumaruno a siam a bulan. Iti panangiburayna ti padas ken kapanunotanna maipanggep iti panag-trainingna, kunana, "Pinanawak ti pamiliak tapno maipokusko a husto ti panagsanayko. Agsanayak gapu iti pamiliak. Makisalipak man wenno saan, ti gagemko ket maaddaan iti napintas a sukog ti bagi ken disiplina. Addaak gapu kadakuada." Idi 1993, nagbaliw ti international weight classifications kalpasanna. Ket gapu iti dayta, nakikompetensia ni Patao iti nababbaba a weight category. Ken kalpasan a bimmaba ti timbangna iti lima a pulgada, inrakurakna kadagiti reporters: "Kimmottongak ngem mariknak a napigsaak pay laeng a kas idi...kayatko a bagkaten ti kabaelak a bagkaten kas met la idi nadagdagsenak."

Segun ken ni Alan Pascua a nanginagan ken ni Vernon Patao kas Outstanding Filipino of Maui, 1906 -2006, "Maibilang isuna kas maysa kadagiti napigsa ken pagraeman a nagan kas US National Champion." Iti World Championship idi 1995, adda iti ranggo a maiktlo ni Vernon, naileppasna ti makaupay a maika pito a puesto iti April US Trials. Nupay kasta, nagtultuloy nga adda pammatina a ti arapaapna iti olimpiada ket saan pay a naggibus.

Iti international level, idi 1996, kualipikado ni Vernon para iti US Team nga addaan iti 275-pound snatch ken 359-pound clean-and-jerk iti World Championships. Iti nairakurak a damag iti Honolulu Star Bulletin idi Agosto 17, 1996, "Kalpasan ti poor performannce a naipakita iti World Championships, naited iti US ti tallo nga orihinal slots iti salip ti olympic weightlifting, bilang nga immadu iti lima." Ni Patao adda iti ranggo a maikapito iti sangapulo a miembros ti US Team.

Iti met inrakurak ti Associated Press idi Hulio 22, 1996, "Vernon Patao iti Wailuku, Maui, nakisalisal ita iti 141 pounds iti Olympic weightlifting ngem gistay dina nabagkat ti weight tapno makaukkon iti medalia...nagturpos laeng iti maikatlo a puesto kadagiti 13 a nakisalip iti umuna a tallo a sesyon nga addaan iti total a 622,75 a pulgada."

Utang ni Vernon daytoy a nagun-odna a kinalaingna iti nagbalin ken nabayagen a trainerna, ni Dr. Nelson Yogi, maysa a legendary figure iti lubong ti weightlifting. Di mailawlawag ni Vernon no kasano ti ragsak a marikna daytoy iti kaadda ni Dr. Yogi gapu iti kinaimbagna kenkuana ken mentorna.

Iti laksid a nagun-odna amin dagitoy a balligi, ti pamiliana pay laeng ti kangrunaan nga inspirasionna. Bayat ti olimpiada, kuna ni Vernon nga agawid pay laeng iti pagtaenganna apaman a malpasna amin ti kompetision.

Ikonsiderar ni Vernon ti makisalip iti 2000 Olympics a naangay idiay Sydney, Australia. Kunana, "Sapay koma ta diak pay agretiro iti weightlifting iti masungad a lawas, kalpasan a bumagkatak pay maminsan." Inlawlawagna pay nga agtalinaed iti ay-ayam no agbalin daytoy a paset ti US "Incentive Plan" a mangipaay iti bayad kadagiti top athletes. Iti dayta a plano ti USA Weightlifting, mabayadan ti $2,500 agingga iti $5,000 dagiti lifters a makaturpos ken karaman iti top eight. Mairaman pay ti bonuses para iti medalia: $15,000 para iti balitok; $10,000 para iti pirak ken $7,500 para iti bronse.

Maysa a paset iti sinao ni Alan Pascua, maysa a gayyem ni Patao, inladawanna no kasano ken ania ti marikna ni Vernon kas maysa a Filipino. Insuratna, "Vernon Patao ken ti pamiliana ket ipagpannakkelda a nagbiagda iti tradision, sirib ken kultura ni Filipino." Awan ti napintas nga ipagpannakkel nga ebidensia no di ti respeto ken panagdayaw tapno matun-oyanna ti kinabaknang ti balligi ken awatenna daytoy manipud kadagiti kakaduana, estudiante ken dagiti mangisursuro kadakuada. Awan sabali a Filipino nga atleta a nabigbig iti sports kas most outstanding Filipino ti Maui, iti Hawaii wenno intero nga Estados Unidos.

Kalpasan ti panagsanayna para iti sertipikasion ti Emergency Medical Technician [EMT] idi 1994, nagbalin ni Patao a firefighter ken miembro ti Maui Fire Department no sadino a naital-o iti ranggo ti Firefighter 3, Apparatus Operator, nga iggemna agingga ita.

Napintas ti nagbalin a masakbayan daytoy Maui Olympian. Iti edadna a 36 ita, kayatna ti makipulapol a makitrabaho kadagiti ub-ubing ngem isuna kas agbalin a trainer ken mentor: "kas pagraem ken pakalaglagipanna ken ni Dr. Yogi." Iti laksid ti asino man, maawatanna ti pateg ti pagdur-asan ti maysa nga atleta.*

*[Naiposte iti Iluko.com idi Nobiembre 13, 2007]
________________________________________________